Erdogan sfidon BE për anëtarësimin: Nuk është më prioriteti ynë, ata do të humbasin, jo ne

Presidenti turk Recep Tayyip Erdogan ka deklaruar se anëtarësimi në Bashkimin Evropian nuk është më ndër prioritetet kryesore të Ankarasë, megjithëse Turqia nuk e përjashton mundësinë e anëtarësimit në të ardhmen.

Në një intervistë për “Al Jazeera”, Erdogan foli për marrëdhëniet mes Turqisë dhe BE-së dhe procesin e gjatë të integrimit të vendit. Ai kritikoi qasjen e Brukselit, duke theksuar se Ankaraja ka pritur prej dekadash për anëtarësimin.

“Evropa nuk e ka integruar Turqinë për 53 vjet dhe nuk planifikon ta bëjë këtë që tani e tutje. Ne nuk e mbyllëm derën”, deklaroi presidenti turk.

Erdogan tha se Turqia vazhdon ta konsiderojë të mundur anëtarësimin në BE, por sipas tij, Ankaraja nuk ushtron më të njëjtin presion për këtë objektiv.

“Ne po mendojmë të bashkohemi me Bashkimin Evropian. Nëse na pranojnë, kjo është në rregull, nëse nuk na pranojnë, kjo është gjithashtu në rregull”, u shpreh ai.

Presidenti turk theksoi se anëtarësimi në BE nuk është aktualisht në krye të axhendës së qeverisë së tij. Erdogan shtoi se Turqia vazhdon t’u përcjellë vendeve evropiane mesazhin se mosafrimi me Ankaranë mund të ketë pasoja edhe për vetë BE-në.

“Prioriteti ynë nuk është Bashkimi Evropian. Ne vazhdimisht u themi atyre se ata do të jenë ata që do të humbasin, jo Turqia”, deklaroi Erdogan.

Procesi i anëtarësimit të Turqisë në BE ka mbetur prej vitesh i bllokuar, ndërsa deklaratat e fundit të presidentit turk sinjalizojnë një qasje më pak të fokusuar te perspektiva e anëtarësimit, pa e përjashtuar plotësisht atë.