RAMA-VUÇIÇ NE DUEL PER MOMENTIN E ARTE/ NJE FOTO ME TRUMP, NJE FITORE POLITIKE

Kryeministri shqiptar Edi Rama dhe presidenti serb Aleksandar Vuçiç do të udhëtojnë drejt Shteteve të Bashkuara për Asamblenë e Përgjithshme të Kombeve të Bashkuara. Por përtej axhendës zyrtare të OKB-së, një tjetër garë politike zhvillohet në prapaskenë: kush do të arrijë të sigurojë kontaktin më të rëndësishëm në Nju Jork, atë me presidentin amerikan?

Për Ramën, një takim me Trumpin do të ishte një mundësi për të dëshmuar se kanalet e komunikimit me Uashingtonin mbeten të hapura dhe se Shqipëria vijon të jetë e pranishme në vëmendjen e administratës amerikane.

Kjo merr një peshë të veçantë edhe në planin e brendshëm politik. Kryeministri përballet me protesta të zgjatura kundër qeverisë dhe një takim në nivelet më të larta të administratës amerikane do t’i jepte një mundësi për ta shndërruar vizitën në një mesazh politik edhe për publikun shqiptar.

Por deri tani, një takim dypalësh Rama–Trump nuk është bërë publik si i konfirmuar.

Pikërisht këtu qëndron edhe misteri i vizitës së kryeministrit shqiptar. Në Tiranë janë përmendur përpjekje për të siguruar kontakte të nivelit të lartë në Uashington, përfshirë kanale politike dhe ndërkombëtare. Në këtë kuadër janë përmendur edhe figura si Tony Blair, lobet greke dhe personalitete të politikës amerikane.

Nëse këto përpjekje do të prodhojnë një takim me Trumpin, mbetet për t’u parë.

Në anën tjetër është Aleksandar Vuçiç.

Presidenti serb ka qenë më i drejtpërdrejtë për pritshmëritë e tij në Nju Jork. Beogradi kërkon të tregojë se, pavarësisht marrëdhënieve të ngushta që Serbia vazhdon të mbajë me Moskën dhe Pekinin, kanalet me Uashingtonin mbeten funksionale.

Por edhe Vuçiç ka një precedent që këtë herë do të kërkojë ta shmangë.

Në shtator të vitit 2025, presidenti serb zhvilloi në Nju Jork një takim me Sekretarin amerikan të Shtetit, Marco Rubio. Në tryezë ishin dialogu politik, ekonomia, tregtia dhe bashkëpunimi mes dy vendeve.