EDI RAMA SFIDON REVOLUCIONIN E FLAMINGOVE: NUK NDIHEM I KËRCËNUAR

Mbi 100 ditë protesta dhe një përplasje që nisën nga mbrojtja e mjedisit, por u shndërrua në një lëvizje me kërkesa politike.

Kryeministri Edi Rama, në një intervistë për gazetën gjermane “Frankfurter Allgemeine Zeitung”, thotë se nuk ndihet i kërcënuar politikisht nga protestat.

Rama e konsideron lëvizjen një sfidë për qeverinë dhe thotë se sfidat mund ta bëjnë një qeveri më të mirë.

Sipas tij, protestat janë pjesë e funksionimit të demokracisë, veçanërisht kur lidhen me mbrojtjen e mjedisit dhe biodiversitetit.

Por protesta, që mori emrin “Revolucioni i Flamingove” për shkak të shqetësimeve mbi habitatet në zonën e Nartës, tashmë ka zgjeruar kërkesat.

Organizatorët kërkojnë ndër të tjera dorëheqjen e qeverisë, më shumë transparencë dhe anulimin e projekteve turistike që kundërshtohen prej tyre.

Në qendër të përplasjes janë edhe projektet në Sazan dhe zonën e Zvërnecit, të lidhura me investitorë të huaj.

Rama kundërshton pretendimin se Shqipëria po “shitet” dhe thekson se Sazani mbetet pronë e shtetit shqiptar.

Kryeministri i konsideron investimet e huaja, veçanërisht në turizëm, pjesë të strategjisë për zhvillimin ekonomik të vendit.

Nga ana tjetër, kritikët e projekteve argumentojnë se zhvillimet turistike në zona të ndjeshme mund të cenojnë habitatet, biodiversitetin dhe komunitetet lokale.

Pikërisht këtu qëndron edhe përplasja kryesore: zhvillim ekonomik përmes investimeve të mëdha apo mbrojtje më e fortë e zonave natyrore.

Rama thotë se nuk e sheh situatën si një pikë thyerjeje politike.

“Zakonisht jam më i mirë kur sfidohem. A do të jem më i mirë edhe këtë herë? Shpresoj. Nuk e di. Koha do ta tregojë”, citohet të ketë deklaruar kryeministri.

Ndërkohë, “Revolucioni i Flamingove” vijon protestat, ndërsa projektet turistike në jug dhe raporti mes zhvillimit ekonomik, transparencës dhe mbrojtjes së mjedisit mbeten në qendër të debatit publik.