MOBILIZIMI I HESHTUR I RUSISE/ ALARM NE EUROPE, 300 MIJË USHTARË NË HORIZONT

Udhëheqësit europianë druhen se Rusia mund të rrisë mobilizimin ushtarak dhe të intensifikojë veprimet hibride ndaj NATO-s pas zgjedhjeve në Rusi.

Sipas The Telegraph, burime perëndimore të inteligjencës flasin për një “mobilizim të heshtur”, me mijëra persona që mund të thirren në shërbim, ndërsa Moska përgatitet administrativisht për një zgjerim të mundshëm të forcave.

Presidenti ukrainas Volodymyr Zelenskyy ka deklaruar më herët se shërbimet ukrainase të inteligjencës besojnë se Moska po planifikon të mobilizojë edhe 300 mijë ushtarë.

Zyrtarët perëndimorë të inteligjencës kanë shprehur dyshime nëse Rusia disponon pajisjet e nevojshme për të dërguar 300 mijë trupa të rinj në fushën e betejës. Sipas tyre, një “mobilizim masiv publik në shkallë shumë të gjerë duket i pamundur”.

Megjithatë, një burim i inteligjencës tha se po vërehen forma të tjera rekrutimi.Shqetësimi europian është shtuar edhe nga frika për sabotime dhe sulme hibride.

Presidenti francez Emmanuel Macron tha se kërcënimi rus është intensifikuar, ndërsa kryeministri polak Donald Tusk paralajmëroi për rrezikun e sulmeve me raketa ndaj vendeve që mbështesin Ukrainën.

Ndërkohë, Moska ka paralajmëruar Britaninë se objektet e saj në Ukrainë mund të konsiderohen objektiva legjitime nëse përdoren për sulme ndaj Rusisë.

Tensionet mes Rusisë dhe Perëndimit mbeten kështu në nivelin më të lartë që prej nisjes së luftës në Ukrainë.