Tragjike/ Nënë e bir gjenden të pajetë në garazhin e banesës, shkak dyshohet…

Një 37-vjeçare dhe djali i saj 21-vjeçar janë gjetur të pajetë në garazhin e banesës së tyre në Partiniko, në provincën e Palermos, Itali. Viktimat janë identifikuar si Rosalia La Manna dhe djali i saj, Vincenzo Troia.

Sipas hetimeve paraprake, dyshohet se ata kanë humbur jetën për shkak të mungesës së oksigjenit dhe përqendrimit të lartë të dioksidit të karbonit në dy depozita nëntokësore, ku familja mbante rrjeta të përdorura për mbledhjen e ullinjve.

Sipas rindërtimit fillestar të ngjarjes, 21-vjeçari kishte zbritur në një prej depozitave për të marrë rrjetat, por nuk ka mundur të dalë prej saj. Nëna e tij, pasi ka konstatuar se djali nuk po kthehej, dyshohet se ka zbritur për ta ndihmuar. Edhe ajo ka mbetur e bllokuar.

Në vendngjarje kanë ndërhyrë ekipet e specializuara të zjarrfikësve të njësisë NBCR, të pajisura me bombola oksigjeni dhe mjete mbrojtëse, për shkak të rrezikut nga prania e gazit.

Hetuesit dyshojnë se dekompozimi i materialit organik të ruajtur për rreth një vit në depozita mund të ketë shkaktuar grumbullimin e sasive të mëdha të dioksidit të karbonit dhe uljen e nivelit të oksigjenit.

Karabinierët kanë nisur hetimet për të përcaktuar rrethanat e sakta të tragjedisë dhe për të verifikuar nëse depozitat dhe mënyra e ruajtjes së materialeve bujqësore plotësonin kushtet e sigurisë.