OPERACIONI I SPAK/ Masë sigurie për dy ekspertë të kriminalistikës, Vlora Hyseni jashtë Shqipërisë

Për herë të parë në historinë e Shërbimit Informativ të Shtetit, ndaj drejtueses së institucionit është caktuar një masë sigurie. Drejtoresha e SHISH, Vlora Hyseni, e cila e mban këtë detyrë prej vitit 2023, është pezulluar nga detyra dhe ndaj saj është caktuar masa “arrest në shtëpi” me vendim të Gjykatës së Posaçme.

Zhvillimi është pjesë e një operacioni të SPAK që vijon të jetë në zhvillim, ndërsa kontrolle dhe veprime hetimore janë kryer edhe ndaj ish-drejtorit të Përgjithshëm të Policisë së Shtetit, Ilir Proda.

Sipas burimeve të cituara në raportime, në qendër të zgjerimit të hetimit janë materialet dhe komunikimet e administruara nga SPAK gjatë hetimit ndaj biznesmenit Ergys Agasi, i arrestuar në kuadër të dosjes së AKSHI-t. Këto materiale dyshohet se kanë çuar hetuesit në një linjë të re hetimore, e cila tashmë është ndarë në një fraksion të veçantë të dosjes.

Vlora Hyseni dyshohet për dy vepra penale, “Përkrahja e autorit të krimit” dhe “Zbulimi i akteve ose të dhënave sekrete”. Megjithatë, deri në publikimin e plotë të akteve të hetimit, nuk janë bërë publike provat konkrete mbi të cilat mbështeten këto dyshime.

Masa e arrestit në shtëpi ndaj Hysenit ende nuk është ekzekutuar. Sipas burimeve të cituara në raportime, drejtoresha e SHISH ndodhet jashtë shtetit.

Hetimi nuk është kufizuar vetëm te drejtimi i strukturave të sigurisë. Masa sigurie janë caktuar edhe ndaj dy ekspertëve kriminalistë të Policisë së Shtetit, njëri me detyrë në Tiranë dhe tjetri në Durrës. Sipas raportimeve, masat ndaj tyre janë ekzekutuar.

Operacioni vijon ndërkohë me kontrolle dhe administrimin e provave, ndërsa pritet që SPAK të bëjë të qartë objektin e plotë të fraksionit të ri hetimor, rolin e personave të përfshirë dhe provat që kanë çuar deri te drejtuesja e Shërbimit Informativ të Shtetit.

Personat ndaj të cilëve janë caktuar masa sigurie gëzojnë prezumimin e pafajësisë deri në një vendim gjyqësor të formës së prerë.