Balla në Bronx, takim me kongresmenin amerikan Ritchie Torres

Kryetari i Grupit Parlamentar të Partisë Socialiste, Taulant Balla, gjatë vizitës së tij në Shtetet e Bashkuara të Amerikës, është takuar me kongresmenin amerikan Ritchie Torres, përfaqësues i Distriktit të 15-të të Nju Jorkut, që përfshin pjesë të Bronx-it.

Takimi u zhvillua në Bronx, një nga zonat ku është përqendruar komuniteti shqiptaro-amerikan në Nju Jork. Gjatë vizitës, Balla u ndal te roli i komunitetit shqiptar në Shtetet e Bashkuara dhe kontributi i tij në forcimin e lidhjeve mes Shqipërisë dhe SHBA-së.

Në Bronx funksionojnë edhe institucione që synojnë ruajtjen e gjuhës dhe identitetit shqiptar te brezat e rinj, përfshirë shkolla dhe programe dygjuhëshe shqip-anglisht.

Balla shprehu mirënjohje për komunitetin shqiptar në SHBA, duke vlerësuar kontributin e tij në ruajtjen e lidhjeve me Shqipërinë dhe në krijimin e urave të bashkëpunimit me vendin pritës.

Ritchie Torres është anëtar i Dhomës së Përfaqësuesve të SHBA-së dhe përfaqëson Distriktin e 15-të të Nju Jorkut. Ai u zgjodh për herë të parë në Kongres në vitin 2020 dhe më herët ka shërbyer në Këshillin Bashkiak të Nju Jorkut.

Në qershor 2026, Torres fitoi zgjedhjet paraprake demokrate për këtë distrikt dhe është kandidati demokrat për zgjedhjet e përgjithshme të nëntorit.