Lavrov kërcënon Evropën: Nëse na sulmoni, lufta do të jetë shumë e shkurtër

Ministri i Jashtëm rus, Sergei Lavrov, ka paralajmëruar se një përplasje e drejtpërdrejtë ushtarake mes Rusisë dhe vendeve europiane do të ishte një luftë “krejtësisht ndryshe” dhe “shumë e shkurtër”. Deklarata u bë nga Lavrov më 16 shtator në Ekaterinburg, ndërsa tensionet mes Moskës dhe vendeve europiane mbeten të larta.

Lavrov tha se Rusia nuk ka, sipas tij, interes të sulmojë vendet perëndimore, por paralajmëroi për një përgjigje ushtarake në rast se Rusia do të sulmohej fillimisht nga Europa.

“Kjo do të jetë një luftë krejtësisht tjetër dhe do të jetë shumë e shkurtër”, deklaroi kryediplomati rus, duke iu referuar skenarit të një sulmi europian ndaj Federatës Ruse.

Në deklaratat e tij, Lavrov akuzoi gjithashtu liderët europianë se po flasin gjithnjë e më shumë për përgatitjen ndaj një konflikti të mundshëm me Rusinë. Sipas tij, rritja e shpenzimeve dhe kapaciteteve ushtarake në Europë mund të shtojë rrezikun e përshkallëzimit.

Paralelisht me këtë retorikë, në Nju Jork u zhvillua takimi i parë dypalësh mes Lavrovit dhe ministrit të Jashtëm gjerman Johann Wadephul që prej nisjes së pushtimit të plotë rus të Ukrainës në vitin 2022. Takimi, në margjinat e Asamblesë së Përgjithshme të OKB-së, zgjati rreth 20 minuta.

Wadephul i kërkoi Moskës të heqë dorë nga ajo që Berlini e konsideron një “rrugë të rrezikshme përshkallëzimi” ndaj Gjermanisë, Europës dhe NATO-s. Sipas palës gjermane, takimi kishte në fokus edhe nevojën për ruajtjen e kanaleve të drejtpërdrejta të komunikimit me Moskën.

Pas takimit, Lavrov deklaroi se nuk kishte dëgjuar propozime të reja nga ministri gjerman. Ndërkohë, gjatë fjalimit në OKB, ai kritikoi kancelarin Friedrich Merz për deklaratat mbi forcimin e kapaciteteve ushtarake të Gjermanisë.

“Kancelari Merz po deklaron se Gjermania duhet të bëhet sërish një fuqi kryesore ushtarake në Europë. A e kupton Berlini se ku mund të çojë kjo? A nuk i kanë mësuar mësimet e Luftës së Dytë Botërore?”, tha Lavrov.

Nga ana tjetër, Berlini ka kërkuar de-përshkallëzim dhe përfundimin e luftës në Ukrainë, duke mbajtur të hapur kanalin diplomatik me Moskën. Takimi Lavrov-Wadephul nuk solli një ndryshim të dukshëm në qëndrimet e dy palëve, por shënoi një kontakt të drejtpërdrejtë në nivel ministrash të Jashtëm pas më shumë se katër vitesh.