“Nuk kemi më çfarë të humbim”, studentja përlotet dhe sfidon pushtetin

Një studente është përlotur gjatë protestës së të rinjve në Tiranë, teksa ka përcjellë një mesazh për arsyet që e kanë nxjerrë në shesh, duke kërkuar dorëheqjen e kryeministrit Edi Rama dhe ndryshime në mënyrën se si funksionojnë institucionet shtetërore. Në një prononcim për mediat, ajo tha se studentët kanë protestuar në mënyrë paqësore për tre muaj, por sipas saj, kërkesat e tyre nuk janë dëgjuar.

E reja renditi disa prej kërkesave të protestuesve, duke përfshirë dorëheqjen e kryeministrit, përmirësimin e kushteve në konvikte, respektimin e ligjit dhe garantimin e drejtësisë. Ajo kundërshtoi gjithashtu përdorimin e dhunës ndaj qytetarëve që protestojnë dhe paralajmëroi se të rinjtë nuk do të tërhiqen nga kërkesat e tyre.

“Po kërkojmë të drejtat minimale. E para, dorëheqjen e Ramës, se na e ka nxirë jetën. E dyta, konviktet të jenë të rregullta. E treta, të respektoni rregullat dhe ligjet, të ketë drejtësi. Mos ushtroni dhunë ndaj popullit kur kërkon të drejtën e vet. Këtë duam ne. Nuk duam asnjë gjë tjetër”, u shpreh studentja.

Gjatë deklaratës, ajo përdori edhe gjuhë të ashpër ndaj institucioneve shtetërore, duke kërkuar që ato të mbajnë përgjegjësi për situatën. Në të njëjtën kohë, kërkoi ndjesë për bizneset private që mund të jenë dëmtuar gjatë protestës, duke bërë dallimin mes pronës private dhe institucioneve publike. Deklaratat e saj përfshinë edhe thirrje për djegien e institucioneve, që pasqyrojnë zemërimin e shprehur nga e reja gjatë prononcimit.

Studentja foli edhe për përvojën e saj personale, duke treguar se jeton në Shqipëri pa familjarët e saj pranë, pasi motra, vëllai dhe prindërit ndodhen jashtë vendit. Ajo tha se është përballur me vështirësi për të kombinuar studimet me punën dhe e përshkroi si të vështirë jetesën në vend, veçanërisht për të rinjtë që përpiqen të përballojnë shpenzimet me të ardhura të kufizuara.

Në deklaratën e saj, studentja kritikoi gjithashtu atë që e konsideron si pabarazi në trajtimin e qytetarëve dhe të personave me pushtet. Ajo kundërshtoi akuzat se protestuesit nuk janë studentë dhe tha se ka studiuar në Fakultetin Ekonomik, ndërsa për disa vite i është dashur të punojë paralelisht me shkollën.

Në fund, e reja u bëri thirrje prindërve që të mbështesin studentët dhe deklaroi se protesta do të vijojë. “Le të dhunojnë sa të duan, zërin tonë nuk mund ta mposhtin. Vetëm nëse na vrisni, nuk do të na shihni më këtu. Nuk kemi më çfarë të humbim”, tha ajo.