Tirana pa transport publik për sot, dëmtimet në autobusë bllokojnë linjat

Transporti publik në Tiranë është pezulluar për ditën e sotme, pas tensioneve dhe incidenteve të regjistruara gjatë protestës në kryeqytet. Shërbimi nuk ka rifilluar sipas parashikimit, pasi një pjesë e autobusëve kanë mbetur të dëmtuar gjatë protestave.

Sipas informacionit të raportuar, drejtuesit e autobusëve janë paraqitur mëngjesin e sotëm për të vijuar punën, por dëmtimet në mjete kanë penguar funksionimin normal të linjave. Ndërkohë, autobusët e linjës së Kamzës kanë vijuar qarkullimin deri në zonën e Kthesës së Kamzës.

Pezullimi i transportit publik prek lëvizjen e qytetarëve në kryeqytet, të cilët duhet të gjejnë alternativa të tjera për të udhëtuar gjatë ditës. Sipas njoftimit të bërë, qarkullimi i autobusëve urbanë parashikohet të rifillojë normalisht ditën e nesërme.