Nga punëtore fabrike në kandidate për presidente të Gjermanisë, kush është Ilse Aigner?

Politikania bavareze Ilse Aigner po shihet si një nga kandidatet kryesore për të pasuar Frank-Walter Steinmeier në postin e presidentit të Gjermanisë. Sipas raportimeve që citojnë burime pranë Unionit Kristian, Aigner ka siguruar mbështetjen e bllokut konservator CDU/CSU dhe të socialdemokratëve të SPD-së, duke u pozicionuar në avantazh për garën presidenciale.

61-vjeçarja mban aktualisht postin e presidentes së Parlamentit të Bavarisë. Përpara karrierës politike, ajo ka punuar në biznesin familjar dhe si punëtore në montimin e komponentëve elektrikë për helikopterë, në një kompani që më vonë u ble nga Airbus.

Aigner hyri në politikë në vitin 1994, kur u zgjodh në parlamentin rajonal të Bavarisë. Katër vite më vonë siguroi mandatin e parë në Bundestag, ndërsa më pas shërbeu si ministre e Bujqësisë në qeverinë e Angela Merkelit.

Rruga e saj drejt posteve të larta politike është veçanërisht e spikatur edhe për faktin se nuk ka diplomë universitare apo diplomë të shkollës së mesme.

Nëse zgjidhet, Aigner do të bëhej gruaja e parë në historinë e Gjermanisë që merr postin e presidentes federale, si dhe politikania e parë kristiansocialiste nga Bavaria në këtë detyrë.

Presidenti federal gjerman zgjidhet nga Asambleja Federale, e përbërë nga 630 deputetë të Bundestagut dhe 630 përfaqësues të landeve. Votimi i ardhshëm pritet të zhvillohet më 30 janar 2027. Megjithatë, pavarësisht mbështetjes së raportuar nga CDU/CSU dhe SPD, kandidatura e Aigner ende nuk është zyrtarizuar.