✦
Thinking ...
Connect with us

Aktualitet

VELIAJ SFIDON ASAMBLENË E TIRANËS ME PYETJEN “PO A JEMI ENDE AJO PARTI?”

Erion Veliaj u kërkon socialistëve të Tiranës të bëjnë diçka të thjeshtë në Asamble. “Hidhni një sy nga shoku në krah.” Pastaj vjen pyetja që ia heq mesazhit çdo ton ceremonial. Kush e ka sot vendin në atë sallë? Socialisti që mblodhi votat, apo një nga ata që Veliaj i quan “ministruca e drejtoruca” dhe i akuzon se “pushtojnë territore me privilegje”?

Goditjen më të fortë Veliaj ia drejton kreut të partisë. Edi Ramën nuk e përmend me emër. Flet për një parti “ku drejtuesi u hakërrehet socialistëve që e ngritën në krye” dhe ku “mijëra vota e vite sakrificash fshihen me një klithmë të tij”. Akuza politike është e qartë. Sipas Veliajt, në PS mund të kesh bindur mijëra qytetarë dhe prapë të humbasësh peshën sapo kundërshton kryetarin.

Për ta bërë këtë akuzë, Veliaj kthehet te viti 2015 dhe te merita për fitoret në kryeqytet. “Fitoret tona nuk na i dhanë as bandat, as krimi dhe as të fortët.” Meritën ua njeh socialistëve që punuan për ato vota dhe qytetarëve të Tiranës. Pikërisht atyre u kërkon sot të mbrojnë edhe të drejtën për të folur brenda partisë që ndihmuan të fitonte.

Por pyetja e Veliajt i kthehet edhe vetë atij. Kur nisën privilegjet të përcaktonin se kush kishte peshë në PS-në e Tiranës? Çfarë bëri ai kur kishte pushtetin për t’i kundërshtuar? Në mesazh nuk jep asnjë emër dhe asnjë rast konkret. Firma “Socialisti me duar të lidhura” tregon nga cili pozicion flet sot. Për vitet kur i kishte duart e lira, edhe Asambleja ka të drejtë t’i kërkojë llogari.

Advertisement