Aflatoksina në qumësht/ Dy mostra misri jashtë normave, AKU njofton asgjësimin e produktit

AKU ka reaguar pas publikimit të analizave për praninë e aflatoksinës në qumësht, duke bërë të ditur rezultatet e kontrolleve të kryera në ushqimin për kafshë dhe masat e marra për misrin e importuar.

Sipas Autoritetit Kombëtar të Ushqimit, nga 1 janari deri më 31 tetor 2026, në Pikat e Inspektimit Kufitar janë marrë 28 mostra të ushqimit për kafshë për analizimin e aflatoksinës B1. Nga këto, 26 kanë rezultuar brenda normave të lejuara, ndërsa dy mostra misri me origjinë nga Greqia kanë rezultuar jashtë standardeve. AKU njofton se produkti është asgjësuar.

Në deklaratën e saj, AKU bën të ditur gjithashtu se ka hartuar një plan tremujor masash për të forcuar kontrollet ndaj misrit të importuar. Në kuadër të këtij plani janë marrë edhe 16 mostra të tjera, të cilat janë dërguar në laboratorin e referencës të ISUV-it për analiza mbi praninë e mykotoksinave.

Deri në daljen e rezultateve, misri do të qëndrojë i bllokuar në magazinat e subjektit importues. Autoriteti nuk ka bërë të ditur ende përfundimet e këtyre analizave.

Ndërkohë, problematikat me cilësinë e drithërave janë evidentuar edhe nga Kontrolli i Lartë i Shtetit gjatë auditimit për periudhën 2020-2025. Sipas konstatimeve të KLSH-së, mangësitë përfshinin kushtet e magazinimit dhe mungesën e infrastrukturës laboratorike për analizimin e parametrave të ndryshëm të cilësisë së grurit dhe misrit.

Reagimi i AKU-së vjen në një moment kur vëmendja është përqendruar te siguria e qumështit dhe mundësia e pranisë së aflatoksinës në zinxhirin ushqimor.