ALARMI NGA BALLKANI! DËNIMI I THAÇIT, SHKËNDIJA QË MUND TË RIHAPË TENSIONET

Dënimi i ish-presidentit të Kosovës, Hashim Thaçi, mund të ketë pasoja për zhvillimet politike në Kosovë, dialogun me Serbinë dhe ekuilibrat e brishtë në Ballkan.

Kështu vlerëson eksperti italian i gjeopolitikës, Alessandro Politi, në një analizë të publikuar në Formiche.net.

Sipas Politit, vendimi mund të shihet edhe në kuadrin e përpjekjeve për vendosjen e një standardi të drejtësisë për krimet e kryera gjatë luftës, pavarësisht përkatësisë politike apo kombëtare të të akuzuarve.

Por procesi gjyqësor vazhdon të kundërshtohet nga një pjesë e shoqërisë kosovare dhe mbështetësit e ish-drejtuesve të UÇK-së, të cilët e kanë cilësuar atë si politikisht të motivuar.

PRISHTINË–BEOGRAD, MARRËDHËNIET NË VËMENDJE

Një tjetër shqetësim lidhet me dialogun Kosovë–Serbi.

Sipas ekspertit italian, vendimi mund ta bëjë edhe më të vështirë klimën politike mes Prishtinës dhe Beogradit dhe të ngushtojë hapësirën për dialog.

Politi argumenton se zhvillimet në skenën politike të Kosovës, të kombinuara me qëndrimet e Beogradit, mund të komplikojnë më tej procesin e normalizimit.

Pavarësisht marrëveshjeve dhe garancive të arritura ndër vite, dialogu Kosovë–Serbi nuk ka prodhuar ende një normalizim të plotë politik.

TENSIONET E BRENDSHME

Në analizë trajtohet edhe situata e brendshme në Kosovë dhe marrëdhënia e saj me Bashkimin Evropian.

Politi paralajmëron për mundësinë e një periudhe të re tensioni politik, veçanërisht nëse problemet ekonomike dhe pakënaqësia qytetare vazhdojnë.

Sipas tij, brezi i ri kosovar kërkon më shumë rezultate konkrete: institucione funksionale, zhvillim ekonomik dhe mundësi për të ndërtuar të ardhmen në vend.

“NJË INCIDENT MUND TË KRIJOJË NJË SITUATË TË RE TENSIONI”

Në përfundim, eksperti italian e konsideron situatën në rajon ende të ndjeshme.

Në një terren ku tensionet politike, problemet sociale dhe mosmarrëveshjet e pazgjidhura vazhdojnë, sipas Politit, edhe një incident i vetëm mund të krijojë një situatë të re tensioni.

Në këtë këndvështrim, dënimi i Hashim Thaçit nuk paraqitet vetëm si një çështje gjyqësore, por si një zhvillim që mund të ketë ndikim në politikën e Kosovës, marrëdhëniet me Serbinë dhe dinamikat e sigurisë në Ballkan.