GABIMI FATAL I FLAMINGOVE, SOLLI BERISHEN

Analisti Skënder Minxhozi ka kritikuar përshkallëzimin e protestave në kryeqytet, duke paralajmëruar se vandalët po përpiqen të marrin peng qendrën e Tiranës.

Në një intervistë ai u shpreh se dhuna po dëmton kauzat e grupeve që kanë dalë në protestë, përfshirë studentët, pedagogët dhe opozitën.

Sipas Minxhozit, protestat e nisura disa muaj më parë kishin arritur të krijonin presion politik mbi qeverinë përmes formave paqësore të reagimit.

Megjithatë, ai vlerëson se mungesa e një projekti të qartë politik nga lëvizja e njohur si “flamingot” përbën një gabim të rëndësishëm.

“Ngulmimi më pas i flamingove për të mos pasur projekt politik, është gafë e madhe”, deklaroi analisti, duke argumentuar se, kur politika tërhiqet dhe mungon një drejtim i qartë, në plan të parë mund të dalin individë që përdorin dhunën.

Minxhozi vuri në dukje se përshkallëzimi i situatës po ndikon edhe te perceptimi publik për protestat. Sipas tij, dhuna rrezikon të njollosë të gjitha grupet e përfshira, pavarësisht kërkesave me të cilat ato kanë dalë në rrugë.

Ai komentoi gjithashtu qëndrimin e kryeministrit Edi Rama, duke e cilësuar njoftimin për masa konkrete ekonomike si një zhvillim të rëndësishëm politik.

Sipas analistit, shqetësimet ekonomike mbeten një nga motivet kryesore të pakënaqësisë qytetare dhe kërkojnë përgjigje konkrete nga qeveria.

Një pjesë të kritikave Minxhozi ia drejtoi edhe opozitës, për të cilën tha se është bërë palë me protestën e dhunshme.

Ai ngriti gjithashtu pikëpyetje mbi funksionimin e reformës në drejtësi, duke deklaruar se ajo nuk ka arritur të japë rezultatet që priteshin.

“Drejtësia po furnizon dhunën, pasi ata të cilët kanë djegur e shkatërruar në Tiranë, lirohen menjëherë nga gjykata”

Në përfundim, analisti theksoi se ruajtja e rendit dhe sigurisë është parësore, ndërsa paralajmëroi se dhuna rrezikon të zhvendosë vëmendjen nga problemet ekonomike dhe kërkesat qytetare që ushqyen protestat.