Ekzekutimi i 15 vjeçarit/ Shqiptari dhe greku vrasin të miturin gjerman për një vajzë

Një 15-vjeçar ka humbur jetën në Gjermani pasi u godit me thikë gjatë një konflikti mes të rinjve në qytetin e Marsbergut.

Sipas mediave gjermane, mes tyre edhe “Bild”, viktima, i identifikuar si Brian, u përfshi në një përleshje ku dyshohet se ishin të pranishëm edhe një 23-vjeçar shqiptar dhe një 22-vjeçar grek.

Policia gjermane ka shpallur në kërkim shqiptarin Albin Bejtullahu dhe grekun Alex Olntasi, ndërsa ka publikuar fotografitë e tyre dhe u ka bërë thirrje qytetarëve për çdo informacion që mund të ndihmojë në lokalizimin e tyre.

Sipas të dhënave paraprake, konflikti dyshohet se nisi për shkak të një borxhi prej 200 eurosh që një vajzë i kishte njërit prej të rinjve. Dy të dyshuarit dyshohet se i kanë kërkuar shumën dhe kanë ushtruar presion ndaj saj.

Në përpjekje për ta mbrojtur vajzën, në konflikt ndërhynë 15-vjeçari Brian dhe një shok i tij. Situata më pas përshkallëzoi dhe të dy u sulmuan me thikë.

Brian mori plagë të rënda dhe ndërroi jetë në vendngjarje, ndërsa shoku i tij mbeti i plagosur rëndë në fytyrë.

Policia vijon hetimet dhe kërkimet për dy personat e shpallur në kërkim. Autoritetet u kanë bërë thirrje qytetarëve që të kontaktojnë policinë nëse kanë informacion mbi vendndodhjen e tyre.