Bota

Inteligjenca Artificiale do të shkatërrojë të vërtetën…

Amitai Etzioni ishte një nga intelektualët amerikanë më me ndikim të shekullit XX-të. Ndërkohë djali i tij Oren, 59 vjeç, është një pionier në studimin e Inteligjencës Artificiale.Ai ishte një nga mendjet kryesore prapa ideologjisë së komunitarizmit, që ndryshe nga liberalizmi klasik, thekson lidhjen midis individëve dhe komunitetit.Ka dhënë për shumë vite mësim në Universitetet e Harvardit dhe Xhorxh Uashington,dhe ka këshilluar disa politikanë, përfshirë ish-kancelarin gjerman Helmut Kohl dhe ish-presidentin e SHBA-së, Barack Obama. Shkrimet dhe ekspertiza e tij mbi një gamë të gjerë temash i dhanë atij titullin “Profesioni i një Njeriu” nga revista “Time”.Etzioni lindi në Këln me emrin Werner Falk përpara se të arratisej nga Gjermania naziste për në SHBA. Oren Etzioni ishte deri vitin e kaluar kreu i Institutit Allen për Inteligjencën Artificiale, instituti kërkimor i nisur nga bashkëthemeluesi i ndjerë i Microsoft, Paul Allen. Më herët, Oren ka dhënë leksionet për shkenca kompjuterike në Universitetin e Uashingtoni, ku kreu kërkime në mësimin e makinerive dhe motorët e kërkimit në internet. Është ai që shpiku termin “lexim me makinë”, që është një nga shtyllat e modeleve të mëdha gjuhësore si ChatGPT. Që të dy kanë dhënë intervista të shumta në jetën e tyre, por kjo është e para që kanë dhënë së bashku. Në maj ata pritën një korrespondent të “DER SPIEGEL” në apartamentin e babait pranë hotelit Watergate në Uashington.

U zhvillua një bisedë mbi çështjet me të cilat ata janë marrë gjatë gjithë jetës së tyre, duke u fokusuar në revolucionin ChatGPT dhe pasojat e tij për shoqërinë tonë. Kjo do të ishte intervista e fundit e rëndësishme e Amitai Etzioni. Ai vdiq dy javë më vonë në moshën 94-vjeçare.

Pyetja e parë ju drejtohet të dyve, babë e bir. A keni frikë nga Inteligjenca Artificiale?

Oren Etzioni:Inteligjenca Artificiale nuk është një krijesë si përbindëshi Goliat apo Frankenshtajni. Ai është thjesht një mjet, edhe pse shumë i fuqishëm. Unë nuk kam frikë nga vetë mjeti, kam frikë nga mënyra se si njerëzit do ta përdorin atë. Për shembull aktorë keqdashës ose shtete diktatoriale.

Amitai Etzioni:Në një moment gjatë Revolucionit Industrial, njeriu e humbi kontrollin e përparimit teknologjik dhe ekonomik. Që nga ajo kohë po përpiqet ta rimarrë atë kontroll. Inteligjenca Artificiale e bën këtë garë edhe më të shpejtë dhe më të vështirë për t’u fituar. Njëkohësisht, po shfaqen lëvizje të reja shoqërore që nuk duan një shoqëri në të cilën do të na dominojnë këto forca.

A shihni njerëz që po protestojnë kundër Inteligjencës Artificiale?

Amitai Etzioni:Të paktën ka disa paralajmërues. Këtu përfshihen edhe njerëzit që refuzojnë të kthehen në zyrë pas pandemisë. Ata thonë: Unë dua të kaloj më shumë kohë me familjen time, dua të luaj video-lojëra në vend që të kaloj kohë në trafik. Tek e fundit, AI është vetëm maja e ajsbergut për një konflikt shumë më të madh që zien në shoqërinë tonë: A është në qendër njeriu apo makina?

Oren Etzioni:Unë dhe im atë nuk jemi aspak dakord në këtë pikë. Sepse e cilëson një fantashkencë idenë se Inteligjenca Artificiale po komploton kundër njerëzimit nga një qendër e të dhënave dhe se ajo funksionon pa zhurmë. Sigurisht, teknologjia nuk është neutrale, por në fund vendimet i marrin njerëzit.

Dhe njerëzit e plotfuqishëm që përdorin këto mjete nuk janë politikanë por sipërmarrës të teknologjisë. Këtë fuqi e ka Mark Zuckerberg dhe Elon Musk dhe jo AlphaGo (programi i AI që mposhti më të mirët në botë në lojën e tavolinës Go në 2017).

Kolegu juaj Geoffrey Hinton, që hodhi bazat shkencore për bumin aktual që po përjeton AI, ka pasur frikë nga krijimi i tij…

Oren Etzioni:Me modele të mëdha gjuhësore si GPT-4, duhet të bëni dallimin midis inteligjencës dhe autonomisë. Intuitivisht ndodh që ne i bashkojmë shpesh të dyja gjërat, sepse njerëzit janë inteligjentë dhe autonomë. GPT-4 është shumë i sofistikuar dhe disi inteligjent, por nuk ka vullnetin e tij. Se sa autonomi merr ai, është një çështje politike dhe jo teknologjike. Për këtë vendosin njerëzit.

Amitai Etzioni:Nuk jam dakord. Çdo ilaç i ri në SHBA ka nevojë për miratim nga Administrata e Ushqimit dhe Barnave. Por nëse disa njerëz në San Francisko shpikin një teknologji të re për falsifikime më të mira, ne duhet të jetojmë me këtë realiteti, edhe nëse kjo shkon kundër vlerave dhe vullnetit tonë politik. Ne nuk mund t’i ndalnim dot edhe po të donim.

Pse jo?

Amitai Etzioni:Sepse kjo teknologji është tashmë e pranishme në botë. Edhe nëse do të kishim një traktat me Kinën, a do ta respektonte Rusia, Venezuela,Jemeni?

Kreu i kompanisë OpenAI Sam Altman, po apelon që të rregullohet industria e tij…

Oren Etzioni:Unë nuk mendoj se kjo është mënyra më e mirë. Ne kemi nevojë për një rregullim specifik. A duhet që një ligj i vetëm i AI të mbulojë gjithçka, nga chatbot-et deri te kontrolli i armëve tona bërthamore? Është më mirë t’i përshtatim me realitetin e ri ligjet tona ekzistuese për të drejtën e autorit, kërkimin mbi ilaçet e reja dhe për të gjitha këto fusha.

Le të flasim për rreziqet që vijnë nga njerëzit që përdorin këto mjete të fuqishme. Nga çfarë keni më shumë frikë?

Oren Etzioni:Për zgjedhjet e ardhshme presidenciale. Dhe çdo zgjedhje tjetër. Shtypshkronja e Gutenberg e bëri shumë të lirë kopjimin e informacionit, interneti e bëri të lirë shpërndarjen globale, dhe tani informacioni po bëhet i lirë për t’u prodhuar. Votuesit mund të bombardohen me mesazhe që duken sikur janë thënë nga Elon Musk ose Angela Merkel. Duhet të rregullohet veprimtaria e aplikacioneve të tilla dhe jo e GPT-4.

Amitai Etzioni:Inteligjenca Artificiale do të shkatërrojë të vërtetën. Ju nuk do të mundeni t’u besoni më syve dhe veshëve tuaj. Kjo është një sfidë për demokracinë dhe për komunitetin tonë.

Cili gënjeshtar është më i rrezikshëm për demokracinë: Donald Trump apo ChatGPT?

Amitai Etzioni:Në një periudhë afatshkurtër, ky çmim i shkon ende Trumpit. Ai ka një mundësi reale për të qenë sërish president. ChatGPT ka të ngjarë të mos ndodhë kurrë. Por në terma afatgjatë, AI përbën kërcënimin më të madh.

Oren Etzioni:Një demagog karizmatik që mund të manipulojë njerëzit është më i rrezikshëm në planin afatgjatë. ChatGPT nuk shkruan fjalime emocionuese dhe rezultati i tij është goxha mesatar, të paktën deri më tani. Por ai mund të komandojë në të njëjtën kohë shumë profile miqësore ndaj Trumpit në Facebook dhe Twitter. Këtu buron edhe rreziku i vërtetë: Donald Trump i kombinuar me paratë për të paguar për 1 milionë mini-GPT.

Amitai Etzioni:Etërit Themelues të Amerikës kishin frikë se turma do të joshej nga një udhëheqës karizmatik. Kjo është arsyeja pse ata krijuan një demokraci indirekte: çdo 2 vjet njerëzit lejohen të votojnë, dhe në periudhën midis mbajnë gojën mbyllur. Teknologjia e sfidon këtë sistem, pasi tani një lider mund të depërtojë direkt tek masat. Trump tashmë ishte në gjendje ta bënte këtë me Twitter, dhe do të jetë edhe më efektiv me chatbots.

Imazhet e krijuara nga AI të Papës me një xhup të bardhë të fryrë, dhe programe që klonojnë zërat nga disa mostra të të folurit po qarkullojnë tashmë në rrjet. Si ta kontrollojmë këtë valë të madhe të përmbajtjes së rreme?

Oren Etzioni:Nuk ka ilaç specifik, rregullimi mund të jetë vetëm pjesë e zgjidhjes. Për shembull, dikush mund të kërkojë vërtetim dixhital, një lloj filigrani që duhet të përfshijë e gjithë përmbajtja e prodhuar nga AI. Teknologjia për këtë është gati. Por mbeten problemet e rregullatorëve. Ato janë kombëtare, ndërsa problemi është ndërkombëtar. Na duhen mjete të tjera.

Cilat mund të jenë ato?

Oren Etzioni:Arsimi. Ne duhet të mësojmë se si ta përdorim këtë teknologji. Mashtruesit e gjyshërve mund të duken si nipat e vërtetë të tyre. Një ditë, dikush që u hoq si kolegu im duke më dërguar një mesazh për të më kërkuar një nder. E kuptova se kisha të bëja me një mashtrues vetëm kur më pyeti për kartat e dhuratave të Apple. Sot pas çdo telefonate duhet të pyesim veten: A është vërtet ai që thotë se është?

Magjepsja globale pas ChatGPT ka shkaktuar një garë midis Microsoft, Google dhe Meta për modelet më të mira të AI. A është teknologjia shumë e rrezikshme për t’ia lënë ekonomisë private?

Amitai Etzioni:Në të ardhmen do të kemi një përqendrim edhe më të madh të pasurisë në duart e pak njerëzve. Nuk është aspak e rëndësishme nëse në fund të garës do të triumfojë Microsoft apo Google. Rëndësi ka nëse industria në tërësi do të pengojë Kongresin e SHBA-së që të miratojë rregulla efektive për të.

Oren Etzioni:Ndërkohë mbetet në fuqi e vërteta themelore e teknologjisë: Ka nxjerrë nga varfëria qindra miliona njerëz.

Amitai Etzioni:Pyetja është, a do të vazhdojë ta bëjë këtë? Në shekujt e fundit, teknologjia na ka çuar nga Mesjeta në një shoqëri të pasur. Çfarë do të sjellin shekujt e ardhshëm? Vetëm më shumë pajisje?

E shihni Inteligjencën Artificiale kryesisht si një kërcënim për shoqërinë tonë?

Amitai Etzioni:Aspak. Emocionet e rreme mund të jenë të dobishme në ndërtimin e kompjuterëve empatikë. Deri tani i kemi mbyllur të moshuarit nëpër azile vetëm sepse është më e lehtë për t’u menaxhuar. A është më mirë që një kompjuter të thotë “Jam i lumtur që të dëgjoj” sesa askush? Unë vetë do të preferoja këtë

Related Topics:"Open AI"bota chatgpt rreziku i inteligjences artificiale teknologji

Bota

Shpalli Zelenskyn në kërkim, Kievi i kujton Moskës urdhrin për arrestimin e Putinit

Ministria e Jashtme e Ukrainës ka reaguar pasi presidenti Volodymir Zelenksy u shpall mnë kërkim nga Kremlini.

Në deklaratë thuhet se një hap i tillë tregon dëshpërimin e makinerisë shtetërore ruse dhe propagandës, të cilat mudohen të shpikin diccka për të tërhequr vëmendje.

“Dëshirojmë t’i kujtojmë të gjithëve se, ndryshe nga njoftimet e pavlera ruse, urdhri i Gjykatës Penale Ndërkombëtare për arrestimin e diktatorit rus Vladimir Putin me akuza për krime lufte është real dhe i zbatueshëm në 123 vende”, thuhet në deklaratën e Kievit zyrtar.

Më 3 maj, mediat ruse raportuan se në listën e personave të kërkuar të Rusisë ishin shtuar se sekretari për Siguri Kombëtare dhe i Këshillit të Mbrojtjes të Ukrainës, Aleksandr Litvinenko, ish-ministri ukrainas i Financave, Aleksandr Shlapak, dhe ish-kreu i Bankës Qendrore të Ukrainës, Stepan Kubiv.

Bota

Rrihet brutalisht eurodeputeti gjerman, çfarë ndodhi? Publikohen fotot

Një sulmi rëndë ka ndodhur mbrëmë teksa deputeti gjerman Matthias Ecke është plagosur rëndë nga disa sulmues të paidentifikuar teksa vendoste postera elektoralë në një rrugë në Dresden.

41 vjeçari është sulmuar papritur nga të panjohurit duke u qëlluar me shkelma e grushte dhe është në gjendje serioze, njoftonte partia e tij Social-Demokrate.

Ai është kandidati kryesor i partisë për rajoni lindor të Saksonisë në zgjedhjet e Parlamentit Evropiane në qershor, për të cilat po bënte fushatë.

Kreu rajonal i partisë Henning Homan, tha për rrjetin gjerman Bild se tre ose katër persona ishin shfaqur papritur dhe nisën të ofendonin grupin që po vendoste posterat me “sharje homofobe” dhe më pas nisën t’i sulmonin ata.

Prej sulmit Ecke kishte humbur ndjenjat shtoi Homan, dhe do të duhet të qëndrojë në spital për një javë.

Policia tha se i njëjti grup personazh kishin sulmuar më herët dhe punonjës të posterave të Partisë së Gjelbër.

Ministrja e brendshme gjermane Nancy Faeser, tha se “nëse provohet që sulmi ndaj Ecke është i motivuar politikisht, është një sulm ndaj demokracisë”.

Partitë e qeverisë dhe ato të opozitës në Gjermani janë përballur me një seri sulmesh fizike e verbale nga anëtarë të publikut kohët e fundit dhe janë detyruar të shtojnë sigurinë.

Bota

Një javë më parë u godit zona ku po punonin forcat amerikane, Pentagoni: S’ka shenja se Hamasi do të sulmojë…

Sekretari amerikan i Mbrojtjes, Lloyd Austin tha se grupi militantëve të Hamasit, nuk duket se po përgatitet për të sulmuar forcat amerikane që po ndërtojnë një port të përkohshëm në brigjet e Gazës, që do të shërbejë për futjen në rajon të më shumë ndihma humanitare. Sipas korrespondentes së Zërit të Amerikës Carla Babb, komentet vijnë rreth një javë pas një sulmi me mortaja pranë vendit ku po punojnë forcat amerikane, që fatmirësisht, rezultoi pa viktima.

Ndërsa forcat amerikane janë drejt përfundimit të një porti të përkohshëm në brigjet e Rajonit të Gazës, sekretari amerikan i Mbrojtjes Lloyd Austin tha se nuk ka të dhëna që tregojnë se grupi i militantantëve të Hamasit do të sulmojë trupat amerikane. Porti po ndërtohet me qëllimin për të lehtësuar futjen në rajon të sa më shumë ndihmave humanitare përmes detit.

“Aktualisht nuk shikoj asnjë të dhënë që tregon se ata kanë një qëllim aktiv për të sulmuar forcat tona”, tha Sekretari amerikan i Mbrojtjes, Lloyd Austin.

Sipas ekspertëve Shtetet e Bashkuara kanë marrë masa të garatojnë sigurinë e trupave po punojnë në Gazë. Izraeli nga ana tjetër është zotuar gjithashtu t’i mbrojë.

Eksperti Brad Bowman nga Fondacioni për Mbrojtjen e Demokracive thotë se ndërsa Uashingtoni po përpiqet të fusë sa më shumë ndihma në Gazë, Hamasi dhe grupet e tjera militante kanë treguar shpërfillje për jetën e civilëve e sipas tij, një mundësi për të vrarë trupat amerikanë, do t’u jepte atyre kënaqësi.

“Ata që bënë sulmin terrorist të 7 tetorit të viti të kaluar në Izrael, që përdorin njerëz si mburojë, që mbajnë peng burra, gra dhe fëmijë të pafajshëm, ata janë po të njëjtët që nuk do të hezitonin të sulmonin ata që përpiqen të sjellin ushqim dhe ujë, për njerëzit e uritur”, tha ai.

Pikat izraelite të kontrollit kanë vonuar kamionët e ndihmave që të hyjnë në Gazë. Shtetet e Bashkuara dhe vendet e tjera kanë hedhur nëpërmjet ajrit pako me ushqime për palestinezët në Gazë, por organizatat e ndihmës thonë se sasia e tyre është e pamjaftueshme.

Me ndërtimin e portit të përkohshëm pritet që në Rripin e Gazës të futen dhjetëra kamionë me ndihma çdo ditë./VOA

Bota

Kremlini paralajmëron: Nëse Perëndimi përfshihet drejtpërdrejt në konfliktin me Ukrainën…

Kremlini i karakterizoi si “të rrezikshme” komentet e Sekretarit të Jashtëm britanik, David Cameron dhe presidentit francez Emmanuel Macron, që sinjalizonin përfshirjen e drejtpërdrejtë të vendeve të tyre në operacionet e Ukrainës në territorin e pushtuar nga Rusia.

“Ky është një përshkallëzim i drejtpërdrejtë i tensioneve rreth konfliktit të Ukrainës, i cili potencialisht mund të përbëjë rrezik për sigurinë evropiane, për të gjithë arkitekturën e sigurisë evropiane”, tha të premten në një konferencë shtypi zëdhënësi i Kremlinit, Dmitry Peskov.

“Këtu ne shohim një prirje kaq të rrezikshme të përshkallëzimit të tensioneve në deklaratat zyrtare. Kjo është një arsye për shqetësimin tonë”, tha ai.

Edhe zëdhënësja e Ministrisë së Jashtme ruse Maria Zakharova tha: “Kjo është hera e parë që një politikan perëndimor e ka pranuar kaq sinqerisht atë që ka qenë prej kohësh një sekret i njohur për shumicën e vendeve të botës: se Perëndimi po kryen një luftë të fshehtë kundër Rusisë me duart e ukrainasve”.

Rusia, shtoi ajo, do të përgjigjet nëse Ukraina kryen sulme kundër territorit rus me armë britanike.

Gjatë një vizite në Kiev, David Cameron i tha agjencisë së lajmeve Reuters se Ukraina ka të drejtë të sulmojë në vetëmbrojtje. “Ashtu si Rusia po godet brenda Ukrainës, ju mund ta kuptoni plotësisht pse Ukraina është detyruar të marrë të gjitha masat për t’u mbrojtur”, tha ai.

David Cameron premtoi 3.7 miliardë dollarë ndihmë ushtarake vjetore për Ukrainën “për aq kohë sa duhet”, duke shtuar të enjten se Londra nuk kishte asnjë kundërshtim ndaj përdorimit të armëve të saj për sulme brenda Rusisë.
Në një intervistë të veçantë të enjten, presidenti francez Macron ritheksoi pikëpamjen e tij se ai nuk e përjashton mundësinë e dërgimit të trupave në Ukrainë, një veprim që Rusia tha se do të çonte në një përshkallëzim të drejtpërdrejtë dhe të rrezikshëm të tensioneve rreth konfliktit në Ukrainë.

Zëdhënësja Zakharova tha se Rusia është e gatshme të marrë në konsideratë propozimet “serioze” të paqes nga Ukraina, bazuar në ato që ajo i quajti “realitetet” ekzistuese dhe shqetësimet e sigurisë së Moskës, përfshirë zotimin që Ukraina të mbetet ushtarakisht neutrale në të ardhmen.

Kushtet e Moskës janë identike me ato që Ukraina tashmë i ka refuzuar disa herë.

Rusia gjithashtu paralajmëroi të premten se do të përgjigjej me “sulme hakmarrëse shkatërruese” nëse Ukraina godet Krimenë ose Urën e Krimesë, që lidh Rusinë jugore me gadishullin e Detit të Zi.

“Ura e Krimesë është sërish në pikëpyetje”, tha Zakharova në konferencë. “Përgatitjet për një sulm ndaj saj, gjë që është e vështirë të besohet, tani po bëhen hapur, me guxim dhe me mbështetjen absolute të drejtpërdrejtë dhe të paturpshme të Perëndimit”.

Moska tha se besonte se Ukraina, e cila së fundmi është furnizuar me sistemin e raketave me rreze të gjatë veprimi “MGM-140” nga Shtetet e Bashkuara, po planifikonte të sulmonte urën përpara ose më 9 maj, që përkon me përvjetorin e mposhtjes së Gjermanisë naziste nga Rusia në Luftën e Dytë Botërore.

Flota ruse e Detit të Zi, e cila është sulmuar vazhdimisht nga Ukraina, është e stacionuar në Krime.

Kievi ka thënë se e konsideron të paligjshëm ndërtimin e urës rrugore dhe hekurudhore, e cila është përdorur në të kaluarën për të lëvizur trupat ruse dhe armatimin, që përdoret kundër Ukrainës. Kievi kërkon kthimin e Krimesë nën autoritetin e Ukrainës. Rusia aneksoi Krimenë në vitin 2014.

Një raketë ruse goditi rajonin qendror të Ukrainës, Kirovohrad të premten, duke plagosur një civil dhe duke dëmtuar shtëpi dhe infrastrukturën civile, tha një zyrtar lokal në rrjetin social Telegram.

Infrastruktura energjetike e Ukrainës ka qenë në shënjestër të sulmeve të intensifikuara të Rusisë në muajt e fundit. Ushtria ruse e ka goditur rrjetin energjetik të Ukrainës me raketa dhe dronë, ndërsa Kievi po përballet me një mungesë serioze të armëve të mbrojtjes ajrore.

Dy persona u vranë të premten në një sulm rus në qytetin e Kurakhovës, që ndodhet në rajonin lindor të Donetskut, ku po zhvillohen luftime të ashpra midis forcave ukrainase dhe atyre ruse./VOA

Bota

Kremlini i quan “përshkallëzuese” komentet e Cameronit për armët britanike në Ukrainë

Kremlini i ka quajtur përshkallëzim i rrezikshëm dhe i drejtpërdrejtë komentet e sekretarit të Jashtëm britanik, David Cameron, se Ukraina mund t’i përdorë armët britanike kundër caqeve brenda Rusisë, nëse dëshiron.

Të enjten, Cameron i premtoi Ukrainës 3.74 miliardë dollarë ndihmë vjetore ushtarake “sa të jetë e nevojshme”.

Gjatë një vizite në Kiev të enjten, ai theksoi po ashtu se Britania nuk është kundër që Ukraina t’i përdorë armët që ia dërgon Britania për sulme brenda Rusisë.

“Ukraina e gëzon atë të drejtë. Sikurse Rusia që po sulmon brenda Ukrainës, mund ta kuptoni lehtë pse Ukraina e ndien nevojën për t’u siguruar se po e mbron veten”, tha Cameron.

Në javët e fundit, Rusia e ka bombarduar pareshtur me dronë dhe raketa infrastrukturën energjetike të Ukrainës.

Komentet e Cameronit e bëjnë Britaninë të mbajë qëndrim më luftarak karshi Rusisë – së paku publikisht – sesa SHBA-ja, e cila thekson se armët me të cilat e furnizon Ukrainën duhet të përdoren vetëm brenda kufijve të Ukrainës të njohur ndërkombëtarisht, dhe jo kundër caqeve brenda territorit të Rusisë.

Ukraina thotë se i përdor dronët e vet dhe armë të tjera për të kryer sulme kundër caqeve brenda Rusisë, si për shembull, kundër rafinerive të naftës apo infrastrukturës hekurudhore.

Zëdhënësi i Kremlinit, Dmitry Peskov, i përshkroi komentet e Cameronit si të rrezikshme.

“Ky është përshkallëzim i drejtpërdrejtë i tensioneve në lidhje me konfliktin ukrainas, i cili ka mundësi të përbëjë rrezik për sigurinë evropiane, për tërë sigurinë evropiane”, tha Peskov.

“Këtu e shohim ne një trend të rrezikshëm të përshkallëzimit të tensioneve në deklarata publike”, shtoi ai.

Zëdhënësja e Ministrisë së Jashtme të Rusisë, Maria Zakharova, tha se kjo është “hera e parë që një politikan perëndimor ka pranuar kaq haptazi një fshehtësi të njohur për kohë të gjatë për shumicën e vendeve të botës: Se Perëndimi po kryen luftë të fshehtë kundër Rusisë përmes ukrainasve”.

Rusia do të përgjigjet nëse Ukraina kryen sulme kundër territorit rus me armë britanike, shtoi ajo.