Maska silikoni dhe armë/ Policia zbardh detaje të reja nga grabitja e argjendarisë në Paskuqan

Detaje të reja dalin nga grabitja e argjendarisë “Luani” në Paskuqan, e ndodhur më 5 gusht. Policia ka zbardhur një pjesë të mënyrës së veprimit të autorëve, ndërsa njëri prej tyre ka përfunduar në pranga.

Në kuadër të operacionit të koduar “Gold”, është arrestuar 35-vjeçari Argys Kalsi, banues në Laç, i dyshuar si një prej autorëve të grabitjes. Sipas Policisë, ai dyshohet se ka vepruar në bashkëpunim me një person tjetër, i cili ende nuk është identifikuar.

Gjatë hetimeve, efektivët kanë gjetur në një zonë të pyllëzuar pranë fshatit Zgafnur një sërë provash materiale që dyshohet se janë përdorur gjatë grabitjes.

Mes tyre janë sekuestruar një kallashnikov, një krehër me fishekë, një skafandër motoçiklete, dy maska silikoni, doreza dhe veshje të tjera.

Në fokus të hetimit janë veçanërisht maskat e silikonit, të cilat imitojnë në mënyrë shumë realiste fytyrën e njeriut dhe dyshohet se janë përdorur nga autorët për të fshehur identitetin gjatë grabitjes.

Policia kishte gjetur më herët edhe motorin e dyshuar të përdorur për arratisjen, i cili ishte hedhur në ujë në zonën e Liqenit të Qinamit.

Sipas hetimeve, autorët hynë në argjendari dhe morën një sasi bizhuterish, për t’u larguar më pas me motor.

Ndërkohë, operacioni hetimor vijon për identifikimin dhe kapjen e bashkëpunëtorit tjetër, si dhe për dokumentimin e plotë të ngjarjes.

Materialet i janë referuar Prokurorisë për veprat penale “Vjedhja me dhunë e kryer në bashkëpunim” dhe “Mbajtja pa leje dhe prodhimi i armëve shpërthyese dhe i municionit”.

Hetuesit po vijojnë të analizojnë provat e sekuestruara për të zbardhur të gjithë skemën e grabitjes dhe rolin e secilit prej personave të përfshirë.