Milanoviq demanton Vuçiqin: Nuk ka aleancë Kosovë-Shqipëri-Kroaci kundër Serbisë, je duke bërë propagandë politike

Presidenti i Kroacisë, Zoran Milanoviq, hodhi poshtë pretendimet e presidentit serb Aleksandar Vuciq i cili sulmoi marrëveshjen ushtarake mes Zagrebit, Tiranës dhe Prishtinës të cilat sipas tij janë kundër Serbisë. Milanoviq i cilësoi akuzat e Vuciqit si të pabazuara dhe propagandistike.
Milanoviq theksoi se Kroacia mbetet një shtet përgjegjës dhe i përkushtuar ndaj stabilitetit rajonal dhe bashkëpunimit ndërkombëtar.
Ai nënvizoi se marrëveshja e bashkëpunimit në fushën e sigurisë dhe mbrojtjes, e nënshkruar nga ministri kroat i Mbrojtjes Ivan Anushiq me homologët nga Shqipëria dhe Kosova, ka karakter ekskluzivisht mbrojtës dhe synon forcimin e stabilitetit dhe bashkëpunimit rajonal.
Milanoviq kritikoi gjithashtu retorikën e tensionuar që po përdoret në disa qarqe politike europiane, duke paralajmëruar se deklaratat e papërgjegjshme mund të rrisin pasigurinë në kontinent.
Duke folur për rolin e NATO-s, ai riafirmoi përkushtimin e Kroacisë ndaj aleancës dhe sigurisë kolektive, por theksoi nevojën për maturi dhe përgjegjësi politike në kohë krizash ndërkombëtare.
Presidenti kroat dënoi agresionin rus ndaj Ukraina, ndërsa bëri thirrje për respektim të së drejtës ndërkombëtare në të gjitha konfliktet globale.