Një president fuqiplotë i Evropës – Plani konservator për të ardhmen e BE

Bashkimi Evropian duhet të ketë një zë të vetëm dhe të fuqishëm në arenën globale, duke bashkuar postet e presidentit të Komisionit Evropian dhe presidentit të Këshillit Evropian në një funksion të vetëm.
Këtë ide e hodhi të mërkurën Manfred Weber, kreu i Partive Popullore Evropiane (PPE), familja më e madhe politike në BE.
Duke folur në një aktivitet me drejtues biznesesh në Bruksel, Weber argumentoi se një reformë e tillë nuk do të kërkonte ndryshime në traktatet e Bashkimit Evropian, por thjesht vendimin që një person i vetëm të mbajë të dyja funksionet. Sipas tij, një ndryshim i tillë mund të realizohet pas zgjedhjeve të ardhshme evropiane në vitin 2029.
“Ne jemi të bllokuar, jemi pa zë, nuk kemi peshë në skenën globale, dhe kjo duhet të marrë fund”, deklaroi Weber, duke theksuar se fragmentarizimi aktual i udhëheqjes së BE-së nuk është i përshtatshëm për sfidat e kohës.
Aktualisht, presidentja e Komisionit Evropian, Ursula von der Leyen, drejton krahun ekzekutiv të BE-së, me kompetenca në fusha kyçe si tregtia, bujqësia dhe tregu i përbashkët.

Ndërkohë, politikat e jashtme dhe të sigurisë ndahen mes përfaqësueses së lartë për politikën e jashtme, Kaja Kallas dhe presidentit të Këshillit Evropian, António Costa, të cilët raportojnë drejtpërdrejt te shtetet anëtare.
Sipas Weber, kjo ndarje e pushtetit e dobëson aftësinë e BE-së për të vepruar me vendosmëri në një kontekst ndërkombëtar gjithnjë e më të paqëndrueshëm, veçanërisht në kushtet e rikthimit të Donald Trump në krye të SHBA-ve.
I pyetur nëse do ta konsideronte veten kandidat për një post të mundshëm “president i Evropës”, Weber nuk e përjashtoi këtë mundësi, por u shpreh i rezervuar.
“Nuk dua t’i përgjigjem kësaj pyetjeje”, tha ai fillimisht, duke shtuar më pas se e ardhmja e këtyre çështjeve varet nga strukturat partiake dhe nga vetë qytetarët evropianë.
Weber drejton PPE-në në Parlamentin Evropian që nga viti 2014 dhe në vitin 2019 kandidoi për postin e presidentit të Komisionit Evropian, por liderët e BE-së zgjodhën në atë kohë Ursula von der Leyen, ish-ministre e Mbrojtjes së Gjermanisë.
Në fjalën e tij, Weber propozoi gjithashtu që vendimmarrja e BE-së në fushën e politikës së jashtme dhe të sigurisë të kalojë nga parimi i unanimitetit në votimin me shumicë të cilësuar. Kjo ide është diskutuar prej vitesh, por has në kundërshtimin e disa liderëve evropianë, përfshirë kryeministrin hungarez Viktor Orbán dhe kryeministrin sllovak Robert Fico, të cilët janë kundër thellimit të mëtejshëm të integrimit evropian.
Në rast se një reformë e tillë nuk është e mundur për shkak të mungesës së konsensusit, Weber sugjeroi që vendet që dëshirojnë të avancojnë integrimin të ecin përpara me një “traktat të veçantë sovraniteti” në fushën e politikës së jashtme, duke krijuar një bërthamë më të fortë dhe më të bashkuar brenda Bashkimit Evropian.