Opozita kërkon dorëheqjen e Ramës/ Çfarë pritet të ndodhë në protestë (SKENARI)

Opozita zhvillon nesër protestën e shtatë kombëtare me kërkesë dorëheqjen e kryeministrit Edi Rama dhe largimin e qeverisë.

Tubimi pritet të nisë në orën 19:00 para Kryeministrisë. Organizatorët e protestës kanë njoftuar Policinë e Shtetit për orarin e fillimit të protestës, por nuk ka një orë se kur do të përfundojë.

Balkanëeb mëson se në protestën e 17 prillit, PD do të rikthejë fjalimet nga drejtues të PD, forumit rinor dhe partive aleate. Gjatë protestave të fundit mungoi podiumi, ndërsa skenari u fokusua te marshimi dhe hedhja e molotovëve e fishekzjarreve drejt institucioneve qeveritare.

Megjithatë, nuk përjashtohet që protesta të marrë edhe zhvillime të tjera gjatë mbrëmjes.

Një tjetër skenar i mundshëm mbetet marshimi i protestuesve në akse të ndryshme të kryeqytetit, në varësi të dinamikës së tubimit dhe orientimit nga organizatorët.

Ndërkohë, Policia e Shtetit ka marrë masa për mbarëvajtjen e rendit dhe sigurisë. Në protestat e kaluara ka patur të angazhuar në terren mbi 1 mijë forca policore.

Opozita kërkon dorëheqjen e qeverisë dhe të kryeministrti Edi Rama pasi ish-zëvendësja e tij, Belinda Balluku rezultoi e përfshirë në afera korruptive, ndërsa SPAK kërkoi edhe arrestimin e saj, por kërkesa u hodh poshtë me forcën e kartonëve nga mazhoranca.