SHBA-Iran në pikën e kthesës? Trump: Nuk do të ketë sulm para zgjedhjeve

Presidenti i Shteteve të Bashkuara, Donald Trump, ka deklaruar të enjten se Uashingtoni po zhvillon, sipas tij, “diskutime produktive” me Iranin, ndërsa tha se SHBA-ja nuk planifikon të nisë një sulm ndaj Teheranit përpara zgjedhjeve të mesit të mandatit për Kongresin, të parashikuara për 3 nëntor.

“Po zhvillojmë diskutime produktive me Republikën Islamike të Iranit”, shkroi Trump në një postim në platformën Truth Social.

Presidenti amerikan tha gjithashtu se bllokada amerikane ndaj porteve iraniane mbetet në fuqi dhe se nafta vijon të transportohet përmes Ngushticës së Hormuzit.

“Ne nuk do ta sulmojmë Iranin në asnjë kohë para zgjedhjeve të mesit të mandatit që do të mbahen në Shtetet e Bashkuara më 3 nëntor”, deklaroi Trump.

Deklaratat vijnë në një kohë kur konflikti SHBA-Iran dhe pasojat e tij ekonomike janë kthyer në një çështje të rëndësishme në debatin politik amerikan. Sipas të dhënave të cituara në raportime, kostoja mujore e luftës arrin në rreth 3 miliardë dollarë, ndërsa çmimet e larta të karburanteve po krijojnë presion mbi kandidatët republikanë në prag të zgjedhjeve.

Trump ka deklaruar në mënyrë të përsëritur se pret një ulje të ndjeshme të çmimeve të naftës pas zgjedhjeve. Ndërkohë, administrata amerikane dhe autoritetet iraniane kanë shkëmbyer gjatë javëve të fundit propozime që synojnë përfundimin e konfliktit dhe rihapjen e plotë të Ngushticës së Hormuzit, një nga korridoret kryesore të transportit të energjisë në botë.

Megjithatë, Trump ka hedhur poshtë propozimin e fundit të Teheranit. Në këtë situatë, mbetet e paqartë nëse bisedimet do të çojnë në një marrëveshje konkrete dhe në normalizimin e qarkullimit përmes Ngushticës së Hormuzit.