Si qëndron e vërteta? Mjekja hedh poshtë deklaratën e Xhakës: E kam vaksinuar…

Rasti i Granit Xhakës lidhur me certifikatën e vaksinimit kundër COVID-19 ka marrë një tjetër zhvillim, pasi mjekja që i ka lëshuar dokumentin ka deklaruar se futbollisti është vaksinuar realisht.

Andrea L., e cila ushtron aktivitetin në një ordinancë në Luzern, ka folur për Blick dhe ka mohuar se certifikata e Xhakës është lëshuar pa kryer vaksinimin. “E kam vaksinuar Xhakën siç duhet”, ka deklaruar ajo.

Sipas mjekes, në fillim të vitit 2022 Xhaka kishte kontaktuar me të për vaksinimin. Ajo tha se futbollisti kishte antitrupa dhe se, për këtë arsye, në rastin e tij ishte parashikuar një dozë përforcuese. Sipas versionit të saj, doza është administruar realisht dhe më pas është lëshuar certifikata përkatëse.

Deklarata e mjekes vjen në një kohë kur ndaj Xhakës raportohet se është hapur një procedurë penale në Zvicër lidhur me certifikatën e vaksinimit kundër COVID-19. Hetimi lidhet me dyshimet për falsifikim dhe mënyrën se si është siguruar dokumenti.

Fillimisht, përfaqësuesi i Xhakës kishte mohuar akuzat dhe kishte deklaruar se futbollisti kishte konfirmim nga mjeku i tij për marrjen e dozave të vaksinës. Më pas, data e dozës së dytë u korrigjua nga 11 nëntor në 8 nëntor 2022.

Vetë Granit Xhaka më vonë pranoi se kishte siguruar një certifikatë vaksinimi, duke e cilësuar vendimin si një gabim. Futbollisti tha se në atë periudhë kishte pasur mosbesim dhe pasiguri ndaj vaksinës dhe se, në vend që të kërkonte sqarime përmes kanaleve përkatëse, kishte zgjedhur të siguronte certifikatën.

Deklarata e fundit e mjekes sjell një version tjetër lidhur me mënyrën se si është lëshuar dokumenti. Andrea L. këmbëngul se vaksinimi ka ndodhur dhe se certifikata është lëshuar mbi bazën e këtij vaksinimi.

Mjekja tha gjithashtu se ordinanca e saj në Luzern vijon të jetë e hapur dhe se ajo vazhdon të presë pacientë, pavarësisht vëmendjes së krijuar rreth çështjes. Ajo e përshkroi situatën e ditëve të fundit si stresuese dhe shprehu shpresën që çështja të sqarohet.

Hetimi në Zvicër vijon dhe mbetet për t’u përcaktuar nga autoritetet nëse ka pasur shkelje ligjore lidhur me certifikatën e vaksinimit të Granit Xhakës.