Superministria e Ramës/ Arbër Hitaj: Po përgatit arkitekturën për fitoren e zgjedhjeve të vitit 2027

Bashkimi i Ministrisë së Brendshme me pushtetin vendor mund të jetë shumë më tepër se një ndryshim institucional.

Gazetari Arbër Hitaj e lexon këtë lëvizje të kryeministrit Edi Rama si një sinjal të fortë politik, me sytë te zgjedhjet lokale të vitit 2027.

 Hitaj argumentoi se fakti që pushteti vendor është vendosur nën të njëjtën strukturë me Ministrinë e Brendshme tregon rëndësinë që kryeministri i kushton bashkive dhe kontrollit të territorit.

“Fakti që e ka çuar te Ministria e Brendshme dhe pushteti vendor tregon se Rama ka një siklet me bashkitë”, u shpreh Hitaj.

Sipas tij, vendosja e kësaj përgjegjësie në duart e një personi që njeh nga afër pushtetin vendor mund të jetë pjesë e një strategjie më të gjerë politike.

Gazetari e cilëson këtë figurë si një lloj “arkitekti” të fushatës për zgjedhjet lokale, duke argumentuar se një pjesë e rëndësishme e mekanizmit zgjedhor dhe administrimit të territorit lidhet me Ministrinë e Brendshme.

“Për të qenë arkitekt i fitores në zgjedhjet lokale, pjesa më e rëndësishme e zgjedhjeve kalon nga Ministria e Brendshme”, tha Hitaj.

Sipas tij, kjo është një barrë e madhe politike, por objektivi kryesor është i qartë: zgjedhjet e vitit 2027.

Në këtë këndvështrim, bashkimi i strukturave nuk shihet vetëm si një reformim i qeverisë, por si një përgatitje e hershme për betejën e ardhshme elektorale.

Por Hitaj shkon edhe më tej.

Ai ngre dyshimin se ndryshimet mund të jenë nxitur nga sinjale që Rama ka marrë nga brenda Partisë Socialiste, përfshirë sondazhe që mund të kenë evidentuar pakënaqësi në nivel vendor.

“Të gjithë lëvizjet lidhen me ndonjë sondazh të brendshëm që Ramës nuk i ka dalë mirë”, deklaroi gazetari.

Sipas kësaj teze, shqetësimi nuk lidhet vetëm me qeverisjen qendrore, por edhe me mënyrën se si PS do të performojë në bashkitë e vendit.

Dhe pikërisht këtu merr kuptim ajo që Hitaj e quan “superministri”.

Një strukturë me peshë të shtuar politike dhe administrative, ku Ministria e Brendshme dhe pushteti vendor vendosen nën të njëjtën ombrellë, ndërsa objektivi afatmesëm mund të jetë kontrolli më i fortë i terrenit përpara zgjedhjeve lokale.

Nëse kjo analizë rezulton e saktë, atëherë beteja për zgjedhjet e 2027-s mund të ketë nisur shumë më herët nga sa duket.

Dhe bashkitë, territori dhe kontrolli i terrenit mund të jenë tashmë në qendër të strategjisë së re politike të Edi Ramës.