Tani vjen goditja në kuti/ Ermal Hasimja: Vota ndëshkuese mund të jetë vendimtare

Politologu Ermal Hasimja vlerëson se vala e protestave ka sjellë një ndryshim të rëndësishëm në klimën politike shqiptare, duke thyer apatinë dhe duke rikthyer veçanërisht të rinjtë në jetën publike.

Hasimja tha se mijëra qytetarë që kanë marrë pjesë në protesta mund të shprehin pakënaqësinë e tyre edhe në zgjedhje, përmes asaj që në politikë njihet si “votë ndëshkuese”.

Sipas tij, është e vështirë të besohet se qytetarët që kanë dalë në shesh duke kërkuar ndryshim do të votojnë më pas për të njëjtën qeverisje.

Hasimja e cilësoi protestën edhe si një “shkollë demokracie”, ku qytetarët kanë diskutuar dhe janë përballur me ide e qëndrime të ndryshme politike. Në këtë mënyrë, sipas tij, protesta ka rritur ndërgjegjësimin qytetar dhe pjesëmarrjen politike.

Politologu argumentoi gjithashtu se protestat kanë dobësuar ndjeshëm qeverisjen, ndërsa lëvizjet e protestës në Tiranë dhe në bashkitë që rrezikojnë ndryshime administrative kanë krijuar një efekt zinxhir, duke nxitur njëra-tjetrën.

Një rol të veçantë, sipas Hasimjas, ka edhe diaspora. Ai tha se shqiptarët jashtë vendit kanë një pakënaqësi të akumuluar ndaj mënyrës së qeverisjes dhe se mundësia për të votuar drejtpërdrejt ka rritur mobilizimin e tyre.

Hasimja hodhi poshtë gjithashtu interpretimet se protestat kanë karakter anti-amerikan apo anti-Trump. Sipas tij, protesta lidhet me pakënaqësitë ndaj qeverisjes, mungesën e transparencës dhe çështjet mjedisore, ndërsa Shqipëria mbetet një vend thellësisht pro-amerikan.

Duke iu referuar protestave për çështjet mjedisore dhe projekteve të diskutueshme, ai tha se qeveria e ka humbur betejën e komunikimit me opinionin publik.

Në fund, Hasimja vlerësoi bashkëpunimin mes grupeve të ndryshme që marrin pjesë në protesta. Sipas tij, pavarësisht dallimeve politike dhe ideologjike, këto grupe janë bashkuar rreth interesit publik, duke krijuar një formë të re përfaqësimi qytetar jashtë strukturave tradicionale partiake.

Për Hasimjan, pyetja kryesore tashmë është nëse energjia e krijuar në shesh do të përkthehet edhe në kutinë e votimit. Dhe nëse kjo ndodh, vota e të rinjve mund të kthehet në një faktor të rëndësishëm ndëshkues ndaj qeverisjes.