“Të ka filmuar Ergys Agasi dhe je në shantazh”, Blushi ngre dyshime për Peleshin

Përplasja në Kuvend është zhvendosur edhe te hetimet që lidhen me biznesmenin Ergys Agasi dhe ish-drejtoreshën e SHISH, Vlora Hyseni. Deputeti i Partisë së Lirisë, Tedi Blushi, ka ngritur pretendime ndaj kryetarit të Kuvendit, Niko Peleshi, duke e pyetur nëse ka pasur kontakte me Agasin dhe nëse është shantazhuar përmes filmimeve.

Gjatë seancës plenare, Blushi deklaroi se kishte informacione se Peleshi ndodhej nën shantazh dhe i kërkoi të jepte dorëheqjen. Ai pretendoi gjithashtu se Agasi mund të kishte filmuar kryetarin e Kuvendit gjatë takimeve mes tyre.

“Jepu llogari shqiptarëve, a e ke takuar Ergys Agasin, a je shantazhuar me video nga Ergys Agasi?”, tha Blushi, duke e lidhur situatën me zhvillimet në dosjen që po hetohet nga SPAK dhe me çështjen e Vlorë Hysenit. Ai kërkoi gjithashtu dorëheqjen e Peleshit dhe përdori një gjuhë të ashpër ndaj funksionimit të Kuvendit.

Tedi Blushi: Të gjitha institucionet kanë rënë. Nuk mund të flasim sot për Parlament dhe për më tepër për një parlament ku edhe kryetari i parlamenti është filmuar nga Ergys Agasi. Të sfidoj kryetar, se në fakt përgjimet treguan se është Taulant Balla kryetar i këtij parlamnet, jepu llogari shqiptarëve a e ke takuar Ergys Agasin, a je shantazhuar me video nga Ergys Agasi, a do përfundosh edhe ti si Vlora Hyseni. Kyçeni këtë parlament, madje vërini flakën. Kemi një President kukull që as ka guximin të reagojë. Prandaj drejtues i seancës për fat të keq kam informacione se je nën shantazh. Jep dorëheqjen. Ta shpërndajmë këtë parlament krimi.

Niko Peleshi: Kujton se dëgjova ndonjë tronditëse që smund ti bëj replikë?! Ishte e gjitha një fantazi, për piano dhe orkestër. Jo, jo, regjistroje,, asnjëherë, ti mbase po. Ti mbase po