Teherani refuzon bisedimet: Trump dhe Netanyahu po bëhen gati të na pushtojnë

Kazem Jalali, ambasadori i Iranit në Rusi, ka thënë se deri më tani Irani “nuk ka nevojë për negociata”, por mbetet një “lojtar racional” që “nuk kërkon luftë”. Ai gjithashtu theksoi se Teherani “nuk i ka mohuar kurrë bisedimet e paqes”, por këmbënguli se duhet të ketë “kushte të përshtatshme” përpara se të fillojë ndonjë dialog.   

Ambasadori i Iranit ka hedhur poshtë gjithashtu pretendimet e Trump se Teherani po negocion me Uashingtonin, duke i quajtur ato “plotësisht të rreme”.  Ai u shpreh se zyrtarët iranianë kanë mohuar vazhdimisht çdo lloj bisedimesh dhe shtoi se, siç kanë shkruar me sarkazëm disa amerikanë, Trump është “pothuajse ulur para një pasqyre duke negociuar me veten”.

Jalali argumentoi se Uashingtoni po nxit negociatat për të minuar unitetin e brendshëm të Iranit dhe për të “kontrolluar çmimet e energjisë”, ndërsa në të njëjtën kohë Trump dhe Netanyahu po “planifikojnë se si ta pushtojnë Iranin”.

Ndërkohë, sekretarja e shtypit e Shtëpisë së Bardhë, Karoline Leavitt, ka këmbëngulur se bisedimet midis Shteteve të Bashkuara dhe Iranit “po vazhdojnë dhe po shkojnë mirë”. Duke folur me gazetarët, Leavitt pohoi se ajo që thuhet publikisht është “shumë e ndryshme nga ajo që na komunikohet privatisht”.  

Jalali përshkroi kushtet minimale të Teheranit për bisedime si një “paqe të qëndrueshme” për të filluar negociatat, identifikim dhe ndëshkim të qartë të agresorit dhe kompensim për dëmet e luftës, duke thënë se disa humbje, siç është vrasja e Udhëheqësit Suprem Ajatollah Ali Khamenei, “nuk mund të kompensohen”.