TRUMP komplimenton ERDOGANIN, por F-35 mbetet peng

Presidenti amerikan Donald Trump ka shprehur vlerësime për homologun turk Rexhep Tajip Erdogan gjatë qëndrimeve të tyre në Nju Jork, duke e përshkruar si një lider të fortë dhe mik. Por, përtej retorikës pozitive mes dy liderëve, disa prej çështjeve më të rëndësishme në marrëdhëniet SHBA-Turqi vijojnë të mbeten në diskutim.

Në qendër është kërkesa e Ankarasë për t’u rikthyer në programin amerikan të avionëve luftarakë F-35. Turqia u përjashtua nga programi pas blerjes dhe marrjes së sistemit rus të mbrojtjes ajrore S-400, ndërsa Uashingtoni vendosi edhe masa sanksionuese në kuadër të CAATSA-s. Në shtator, Erdogan deklaroi se bisedimet me SHBA-në për rikthimin në program vazhdojnë.

Një tjetër çështje është furnizimi me motorë amerikanë F110 për avionin luftarak turk KAAN. Për këtë çështje ka pasur zhvillime të ndara nga dosja e F-35 dhe në korrik administrata Trump ndërmori hapa për zhbllokimin e shitjes së motorëve për Turqinë.

Në planin ekonomik, ndërkohë, marrëdhëniet mes dy vendeve kanë shënuar një zhvillim konkret. Turkish Airlines finalizoi më 23 shtator marrëveshjen me Boeing për deri në 150 avionë 737 MAX, me porosi të firmosur për 100 Boeing 737-8 dhe opsion për 50 avionë të tjerë.

Pavarësisht këtyre zhvillimeve, çështja e S-400, rikthimi i Turqisë në programin F-35 dhe bashkëpunimi në fushën e industrisë së mbrojtjes mbeten pjesë e agjendës strategjike mes Ankarasë dhe Uashingtonit. Kështu, marrëdhëniet mes Trumpit dhe Erdoganit shoqërohen me deklarata pozitive, por edhe me dosje të rëndësishme që vazhdojnë të kërkojnë zgjidhje.