Trump u kërkon liderëve myslimanë t’i bashkohen Akordeve të Abrahamit pas përfundimit të luftës me Iranin

Presidenti amerikan Donald Trump u ka thënë liderëve të disa vendeve arabe dhe myslimane se, nëse arrihet një marrëveshje për përfundimin e luftës me Iranin, ata duhet të bashkohen me Akordet e Abrahamit dhe të normalizojnë marrëdhëniet me Izraelin, sipas dy zyrtarëve amerikanë të cituar nga Axios, me njohuri direkte mbi telefonatën.
Deklaratat u bënë gjatë një telefonate me liderë nga Arabia Saudite, Emiratet e Bashkuara Arabe, Katari, Pakistani, Turqia, Egjipti, Jordania dhe Bahreini, ku u diskutua një kornizë e mundshme për përfundimin e konfliktit me Iranin.
Këto deklarata sinjalizojnë fazën e radhës që Trump synon në Lindjen e Mesme: zgjerimin e Marrëveshjeve të Abrahamit dhe riformësimin e arkitekturës diplomatike të rajonit pas përfundimit të luftës me Iranin.
Administrata amerikane synon kryesisht një marrëveshje potenciale normalizimi mes Arabisë Saudite dhe Izraelit, por kushtet politike në rajon dhe situata e brendshme në Izrael e bëjnë të vështirë një përparim të shpejtë.
Sipas burimeve, disa liderë — përfshirë presidentin e Emirateve, Mohammed bin Zayed — shprehën mbështetje për përpjekjet për arritjen e marrëveshjes me Iranin.
Trump gjithashtu u tha pjesëmarrësve se do të kontaktonte më pas kryeministrin izraelit Benjamin Netanyahu dhe se do të ishte e dëshirueshme që në të ardhmen Izraeli të përfshihej drejtpërdrejt në këto biseda.
Një zyrtar amerikan tha se Trump theksoi se vendet që nuk janë pjesë e Marrëveshjeve të Abrahamit duhet të ecin drejt normalizimit me Izraelin pas përfundimit të luftës.
Sipas të njëjtave burime, disa liderë u surprizuan nga kërkesa dhe në një moment në linjë u regjistrua heshtje.
Trump u tha liderëve se të dërguarit e tij, Jared Kushner dhe Steve Witkoff, do të vazhdojnë kontaktet diplomatike në javët në vijim.
Ai gjithashtu përmendi, sipas zyrtarëve, mundësinë afatgjatë që edhe Irani të bashkohet një ditë me Marrëveshjet e Abrahamit — një skenar që konsiderohet shumë i pamundur, duke pasur parasysh qëndrimin e Teheranit ndaj Izraelit.
Arabia Saudite mbetet aktori kyç. Princi i kurorës Mohammed bin Salman ka shprehur më herët gatishmëri për normalizim me Izraelin, por qëndrimi i Riadit është bërë më i kujdesshëm gjatë vitit të fundit.
Zyrtarët sauditë kërkojnë që çdo marrëveshje të përfshijë një rrugë të pakthyeshme drejt krijimit të një shteti palestinez — një kusht që qeveria aktuale izraelite e kundërshton.
Sipas vlerësimeve diplomatike, Arabia Saudite nuk pritet të ndërmarrë hapa të mëdhenj para zgjedhjeve të ardhshme në Izrael dhe formimit të një qeverie të re.
Senatori republikan Lindsey Graham nga ana tjetër e mbështeti nismën e Trump, duke e quajtur zgjerimin e Marrëveshjeve të Abrahamit një nga zhvillimet më domethënëse në historinë moderne të Lindjes së Mesme, por paralajmëroi pasoja për vendet që refuzojnë t’i bashkohen procesit.