“Marrim 250 mijë pension me bashkëshorten”/ I moshuari: Si do të jetojmë?

Nga dita e 118 e protestës, një i moshuar ka rrëfyer përvojën e tij me sistemin shëndetësor dhe vështirësitë ekonomike me të cilat, sipas tij, përballet prej vitesh.

Ai tregoi se është diagnostikuar me kancer dhe se për rreth një vit është trajtuar në Shqipëri. Sipas rrëfimit të tij, gjatë kësaj periudhe nuk kishte mundur të kryente një biopsi dhe mjekët i kishin dhënë pak shpresë për përmirësimin e gjendjes.

“Jam me kancer. Jam kuruar në Shqipëri për një vit, nuk më bënin dot biopsi. Doktorët më prenë shpresat”, tha ai, duke treguar se familja më pas vendosi ta dërgonte jashtë vendit për trajtim.

Sipas të moshuarit, procedurat që nuk ishin realizuar në Shqipëri u kryen brenda një dite jashtë vendit. Ai tha se kanë kaluar pesë vite nga trajtimi dhe se sot vazhdon të jetë në gjendje të mirë shëndetësore.

Rrëfimi i tij u shoqërua edhe me shqetësime për situatën ekonomike. I moshuari tha se së bashku me bashkëshorten marrin rreth 250 mijë lekë pension në muaj, ndërsa një pjesë e të ardhurave, sipas tij, shkon për trajtimin dhe medikamentet që përdor.

Ai tha se familja mbështetet edhe te fëmijët, të cilët, sipas tij, i ndihmojnë financiarisht pavarësisht se kanë familjet e tyre. I moshuari kërkoi më shumë mbështetje nga shteti për pensionistët dhe personat që përballen me shpenzime të larta shëndetësore.

Gjatë fjalës së tij, ai iu referua edhe historisë së tij personale, duke deklaruar se është ish-i burgosur politik dhe se nuk është ndier i mbështetur nga qeveritë ndër vite.

Në fund, ai iu drejtua të rinjve dhe studentëve me thirrje për pjesëmarrje në protestë, duke shprehur bindjen se një mobilizim masiv mund të sjellë ndryshime të shpejta politike. Deklarata e tij vjen në kuadër të protestës që, sipas organizatorëve, ka hyrë në ditën e 118-të.