3 VJET NGA BANJSKA/ BE i kërkon llogari Serbisë

Tre vjet pas sulmit të armatosur në Banjskë të Zveçanit, Bashkimi Evropian ka përsëritur thirrjen që personat e dyshuar për përfshirje në ngjarje të përballen me drejtësinë. BE shprehu keqardhje që Serbia, sipas tij, nuk ka ndërmarrë deri tani hapat e nevojshëm ndaj personave që ndodhen në territorin serb.

Sulmi ndodhi më 24 shtator 2023, kur një grup serbësh të armatosur sulmoi Policinë e Kosovës në Banjskë. Si pasojë mbeti i vrarë rreshteri Afrim Bunjaku, ndërsa gjatë përleshjeve u vranë edhe tre nga sulmuesit.

Një nga emrat kryesorë të lidhur me ngjarjen është Milan Radoiçiç, ish-nënkryetar i Listës Serbe, i cili ka marrë përgjegjësinë për organizimin e sulmit. Radoiçiç ndodhet në Serbi dhe Kosova ka kërkuar vazhdimisht që ai të ekstradohet dhe të përballet me drejtësinë.

BE-ja thotë se ka kërkuar në mënyrë të përsëritur që përgjegjësit e sulmit të ndiqen penalisht dhe pret nga Serbia bashkëpunim përmes mekanizmave të ndihmës së ndërsjellë juridike. Sipas zëdhënësit të BE-së, çështja ka mbetur pezull për një kohë të gjatë dhe duhet trajtuar.

Çështja e Banjskës është ngritur edhe gjatë kontakteve diplomatike në Nju Jork. Përfaqësuesja e Lartë e BE-së për Politikën e Jashtme dhe Sigurinë, Kaja Kallas, e ka diskutuar atë me presidentin serb Aleksandar Vuçiç, ndërsa kryeministri i Kosovës, Albin Kurti, e ka ngritur gjithashtu këtë çështje në takimin me Kallas.

Kosova ka ngritur aktakuzë ndaj 45 personave për sulmin në Banjskë, përfshirë Radoiçiçin. Ndërkohë, procesi gjyqësor në Kosovë është zhvilluar ndaj tre të akuzuarve dhe në shkallën e parë janë dhënë dënime me burgim.

Tre vjet pas sulmit, kërkesa për zbardhjen e plotë të përgjegjësive dhe ndjekjen penale të të dyshuarve që ndodhen në Serbi mbetet një nga çështjet e hapura në marrëdhëniet Kosovë-Serbi dhe në dialogun e ndërmjetësuar nga Bashkimi Evropian.