Nuk pret koha/ Nga kualifikimi në Europian te ndeshjet e fundjavës, legjionarët janë gati

Me kualifikimin tashmë të siguruar, ashtu sikurse dhe vendin e parë në grup, futbollistët shqiptarë janë kthyer në klubet e tyre respektive ku pritet të zbresin në fushë që në fundjavë. Pavarësisht energjive të konsumuara në ndeshjet e fundit me Moldavinë dhe Ishujt Faroe, legjionarët janë gati të bëjnë maksimumin, këtë herë në ndeshjet në nivel klubesh, sidomos ata që vijnë nga kampionati italian që përfaqësoi numrin më të lartë të shqiptarëve në formacionin e trajnerit Sylvinho.

Nga dyshja e Empolit, Berisha-Ismajli, tek Asllani për të vijuar te Nedim Bajrami, Hysaj dhe Gjimshiti, të gjithë u kthyen menjëherë në ekipet respektive. Empoli shpreson shumë që Berisha dhe Ismajli të vijojnë me formën e tyre fantastike ndërsa janë stërvitur rregullisht me pjesën tjetër të ekipit. Me shumë minuta në këmbë, por me më shumë vetëbesim edhe Asllani është stërvitur rregullisht me Interin në vigjilje të sfidës kundër Juventuesit, i gatshëm për të zëvendësuar Calhanoglu në çdo moment.