Të mbetet i skalitur në pushtet/ Albin Kurti projekton qëllimin

“Egoja e Kurtit prevalon mbi partinë” – kështu u shpreh publicisti Ben Andoni, sipas të cilit kryeministri i Kosovës po kërkon ta shrijë ndikimin e tij ngado. Përfshirja e Lëvizjes Vetëvendosje në garën për zgjedhjet parlamentare në Maqedoninë e Veriut, sipas Andonit rrezikon të cënojë edhe zgjedhjet në Kosovë.

“Ekspansioni politik i Vetëvendosjes  tregon se Albin Kurti ka synime të qarta për të qëndruar gjatë dhe fort në pushtet” – ka deklaruar analisti I njohur.

Kryeministri i Kosovës, Albin Kurti do të garojë për pushtet edhe në Maqedoninë e Veriut. Partia e tij dje u fut zyrtarisht në koalicion me opozitën shqiptare në shtetin fqinj për zgjedhjet parlamentare atje që do të mbahen më 8 maj 2024.

Kujtojmë se Kurti është futur që herët në këtë garë, duke u renditur kah partitë shqiptare në opozitë si Alternativa, Lëvizja Besa dhe Lëvizja Demokratike.

Gazetari dhe publicisti, Ben Andoni tha se Kurti “do ta shndërrojë Vetëvendosjen në një parti pan-kombëtare, duke kërkuar të shtrijë ndikimin e tij ngado”. Këtë plan të shefit të Qeverisë së Kosovës, ai e quan “disi agresiv” dhe “jo normal”.

Shpalosja hapur e Kurtit me interesa politike edhe jashtë territorit të Kosovës, sipas Andonit do t’ia bëjë faktorit maqedon më të lehtë përballjen me faktorin shqiptar në Maqedoninë e Veriut.

“Sepse mund të përdoret lehtësisht elementi i ndërhyrjes së Kurtit në punët e brendshme të Maqedonisë së Veriut” – ka theksuar Andoni, i cili gjithashtu beson se kjo shpërfaqje e Kurtit rrezikon të cënojë dhe zgjedhjet në Kosovë, pasi parashikohet se partia e Kurtit do të përpiqet thjesht ta mbajë atë në pushtet dhe “të shuajë pak e nga pak çdo fushë për opozitën”.

“Besoj se egoja e Kurtit prevalon mbi partinë. Vetëvendosja tani duket thjesht si zgjatim i tij. Me ndërfutjen politike te Vetëvendosjes në Shqipëri e Maqedoninë e Veriut, duket se LVV-ja mendon vetëm për Kurtin si lider dhe interesat e tij” – Potencoi analisti Ben Andoni.