20-vjeçari pjesë e forcave të armatosura, dyshohet se u ndoq nga shoku i fëmijërisë

Detaje të reja janë raportuar lidhur me vrasjen e 20-vjeçarit Johan Zuko, ngjarje e ndodhur pasditen e kësaj të shtune në lagjen nr. 14 të Korçës.

I riu ishte pjesë e Forcave të Armatosura të Shqipërisë dhe, sipas informacioneve paraprake, kishte pak kohë që ishte punësuar në radhët e tyre.

Të dhënat e deritanishme bëjnë me dije se autori i dyshuar dhe viktima njiheshin prej vitesh dhe kishin qenë shokë që në fëmijëri. Mes tyre dyshohet se ka pasur një konflikt, ndërsa rrethanat dhe motivi që çuan në ngjarjen e rëndë mbeten ende nën hetim.

Sipas rindërtimit paraprak të dinamikës, Zuko, i cili nuk ishte banor i lagjes ku ndodhi krimi, ka tentuar t’i largohet personit që po e ndiqte duke u futur në zonën e pallateve. I dyshuari dyshohet se e ka ndjekur deri pranë ose brenda hyrjes së një pallati, ku 20-vjeçari është qëlluar me armë zjarri dhe ka humbur jetën.

Pas ngjarjes, autori i dyshuar është larguar dhe vijon të jetë në kërkim. Policia ka ngritur postblloqe dhe po ushtron kontrolle në akset hyrëse dhe dalëse të qarkut të Korçës me qëllim lokalizimin dhe kapjen e tij.

Sipas informacioneve të raportuara deri tani, personi i dyshuar për vrasjen rezulton me precedentë të mëparshëm penalë. Hetuesit kanë administruar gjithashtu pamje të kamerave të sigurisë dhe po marrin dëshmi nga persona që mund të kenë dijeni për ngjarjen.

Grupi hetimor vijon punën për të përcaktuar motivin e konfliktit, dinamikën e plotë të vrasjes dhe përgjegjësinë e personave të përfshirë. Pritet që Policia e Korçës të japë të dhëna të tjera zyrtare ndërsa operacioni për kapjen e të dyshuarit vazhdon.