ZGJEDHJET/ BEOGRADI NE RADARIN E WASHINGTONIT

Zgjedhjet e 25 tetorit në Serbi po marrin vëmendje të shtuar në Uashington. Kongresmeni amerikan Joe Wilson ka ngritur shqetësime për kushtet në të cilat pritet të zhvillohet procesi zgjedhor, duke përmendur protestat studentore, lirinë e medias, përdorimin e forcës dhe teknologjitë e mbikëqyrjes.

Në një deklaratë për N1, Wilson tha se ekziston shqetësim legjitim se zgjedhjet mund të mos jenë të lira dhe të ndershme. 

Ai theksoi se Shtetet e Bashkuara nuk synojnë të mbajnë anën e një partie apo kandidati, por kërkojnë që qytetarët serbë të kenë mundësi të votojnë lirshëm.

 “Gjithçka është e ndërlidhur”, tha Wilson, duke iu referuar klimës politike, protestave, medias dhe mbikëqyrjes.

Kongresmeni amerikan ka ngritur gjithashtu shqetësime për përdorimin e teknologjive të mbikëqyrjes dhe marrëdhëniet e Beogradit me Kinën dhe Rusinë. 

Ndërkohë, Departamenti amerikan i Shtetit ka deklaruar se po i ndjek nga afër përgatitjet për zgjedhjet.

Edhe OSBE/ODIHR ka vendosur një mision vëzhgimi për zgjedhjet parlamentare të 25 tetorit, duke e përfshirë procesin zgjedhor serb në kalendarin e misioneve të saj të vëzhgimit.

Mesazhi nga Uashingtoni vjen në një moment kur Beogradi përballet me presion të shtuar ndërkombëtar për kushtet zgjedhore. 

Ndërsa 25 tetori po afron, vëmendja nuk do të jetë vetëm te rezultati i kutive të votimit, por edhe te mënyra se si do të zhvillohet i gjithë procesi.