Granit Xhaka largohet nga Kombëtarja, por refuzon të dorëzojë shiritin e kapitenit

Granit Xhaka ka pranuar publikisht se ka blerë një certifikatë të falsifikuar vaksinimi kundër COVID-19, duke e cilësuar veprimin si një gabim të rëndë dhe duke marrë përgjegjësinë për të.

Në një deklaratë të publikuar në rrjetet sociale, mesfushori 33-vjeçar shprehu keqardhjen për veprimin dhe bëri të ditur se po bashkëpunon me autoritetet zvicerane në lidhje me çështjen.

Sipas informacioneve të bëra publike, hetimet nisën pas dyshimeve të autoriteteve të Lucernës ndaj një mjeku që dyshohet se i kishte lëshuar futbollistit dokumentin e falsifikuar. Fillimisht, kampi i Xhakës e kishte mohuar akuzën dhe kishte deklaruar se vaksinimi ishte kryer rregullisht në vitin 2022.

Më pas, pas zhvillimeve të hetimit, Xhaka ka pranuar përdorimin e certifikatës së falsifikuar. Ai ka shpjeguar se vendimi ishte ndikuar nga frika, pasiguria dhe mosbesimi ndaj vaksinës, në një periudhë kur synonte të garantonte pjesëmarrjen në Kampionatin Botëror të Katarit.

Pas pranimit të tij, me propozim të vetë lojtarit dhe miratimin e Federatës Zvicerane të Futbollit, Xhaka do të mungojë në grumbullimin trejavor të kombëtares dhe në katër ndeshjet e ardhshme të Ligës së Kombeve.

Pavarësisht situatës, Xhaka synon të vazhdojë të mbajë rolin e kapitenit të kombëtares zvicerane. Drejtuesit e federatës kanë lënë të hapur diskutimin për të ardhmen e tij në këtë rol, ndërsa çështja do të trajtohet edhe në vijim në varësi të zhvillimeve ligjore.