Pedagogët dalin në krah të studentëve, kërkojnë fundin e dhunës: Mbështesim protestën

Pedagogët janë bashkuar në mbështetje të studentëve që prej tetë ditësh protestojnë, duke zhvilluar një marshim paqësor që nisi në orën 10:00. Në këtë tubim morën pjesë edhe shkrimtarë dhe përfaqësues të komunitetit akademik, të cilët kërkuan dëgjimin e zërit të të rinjve, ndalimin e dhunës dhe përmirësimin e kushteve në arsim.

Mes pjesëmarrësve ishte edhe shkrimtarja Rita Petro, e cila u shpreh kundër dhunës ndaj të rinjve dhe kërkoi një zgjidhje të shpejtë për të ulur tensionet. Ajo deklaroi se një grup shkrimtarësh i ishte bashkuar marshimit të pedagogëve në mbështetje të studentëve, duke theksuar se të rinjtë janë më të pambrojtur përballë situatave të krijuara gjatë protestave.

Petro u shpreh se është e rëndësishme që palët të gjejnë një rrugëdalje sa më shpejt, ndërsa vuri në dukje se mbështetja e tyre përqendrohet te të rinjtë dhe te nevoja për të garantuar sigurinë e tyre.

Edhe pedagogu Ardian Isufi e cilësoi të domosdoshme mbështetjen ndaj studentëve, veçanërisht pas episodeve të dhunës të regjistruara gjatë protestave. Ai u distancua nga çdo formë dhune dhe theksoi se ngjarjet e ditëve të fundit nuk i shërbejnë shoqërisë.

Sipas Isufit, shteti dhe policia duhet të tregojnë kujdes të veçantë në trajtimin e të rinjve që protestojnë për të drejtat e tyre në fushën e arsimit. Ai rikujtoi se prej vitesh është kërkuar një strategji e re kombëtare për arsimin, duke argumentuar se mungesa e prioritizimit të kësaj fushe nga qeveria ka ndikuar në akumulimin e pakënaqësive. Sipas tij, kjo indinjatë tashmë është shndërruar në një protestë me shtrirje kombëtare.

Një tjetër pedagog u shpreh se komuniteti akademik duhet të mbështesë studentët dhe të kërkojë që zëri i tyre të dëgjohet. Ai paralajmëroi se protestat mund të përshkallëzohen, por theksoi se përdorimi joproporcional i forcës, veçanërisht nga policia, përbën një çështje serioze që duhet trajtuar në përputhje me ligjin.

Ndërkohë, një pedagoge tjetër u shpreh kundër dhunës nga ana e studentëve, por vuri theksin edhe te vështirësitë ekonomike me të cilat përballen të rinjtë. Sipas saj, një pjesë e studentëve detyrohen të punojnë me orë të zgjatura për të përballuar shpenzimet e jetesës, duke pasur më pak kohë në dispozicion për studimet. Ajo argumentoi se kjo situatë ndikon në formimin e tyre akademik dhe kërkoi përmirësimin e kushteve për studentët.

Marshimi i pedagogëve vjen në ditën e tetë të protestës së studentëve, në një klimë të tensionuar pas përplasjeve të ditëve të fundit. Pjesëmarrësit kërkuan që kërkesat e të rinjve të merren seriozisht, ndërsa dënuan dhunën dhe bënë thirrje për përmirësimin e kushteve në arsim.