Arresti i Hysenit, Petraj shpërthen: Pse drejtoreshë ndërmarrjeje është ajo

Avokati Edmond Petraj ka shprehur shqetësim për masën e sigurisë “arrest në shtëpi” ndaj ish-drejtoreshës së SHISH, Vlora Hyseni.

Petraj tha se është e pazakontë që një drejtues i shërbimit inteligjent të përballet me një masë të tillë sigurie, veçanërisht në mungesë.

Sipas tij, informacionet dhe komunikimet që po publikohen në media duhet të verifikohen dhe të filtrohen përpara se të përdoren në diskutimin publik.

Petraj deklaroi se nuk mund të nxirren përfundime vetëm mbi bazën e njoftimit për masën e sigurisë, duke kërkuar që vendimi gjyqësor dhe provat të bëhen të qarta.

Avokati u shpreh gjithashtu skeptik ndaj disa pretendimeve të publikuara në media për lidhjet mes Hysenit dhe biznesmenit Ergys Agasi, duke theksuar se ato duhet të verifikohen profesionalisht.

“Shqetësimi im është që kemi një shef të inteligjencës në një masë sigurie. Në rrallë vende në botë ndodh që për shefen e inteligjencës të jepet masë sigurie”, tha Petraj.

Ai shtoi se për të gjykuar mbi akuzat ndaj Hysenit duhet parë vendimi i plotë i gjykatës dhe materialet mbi të cilat është bazuar masa e sigurisë.