Klodiana Lala zbulon prapaskenat: Çfarë dyshohet se Vlora Hyseni i dha Agasit

Gazetarja Klodiana Lala ka zbardhur detaje të reja mbi hetimin ndaj ish-drejtoreshës së Shërbimit Informativ të Shtetit, Vlora Hyseni, ndaj së cilës Gjykata e Posaçme ka caktuar masën e sigurisë “arrest në shtëpi”.

Lala tha se hetuesit dyshojnë se Hyseni i ka vënë në dispozicion biznesmenit Ergys Agasi informacione të siguruara për shkak të funksionit të saj në krye të SHISH-it, të cilat nuk ishin të destinuara për t’u bërë publike.

Sipas Lalës, dyshimet e prokurorisë mbështeten në materiale të siguruara përmes përgjimeve, të dhëna të administruara nga telefonat në momentin e arrestimit të Agasit dhe ish-zyrtarit të lartë Uljan Shpataraku, si dhe në vëzhgime, dëshmi dhe këqyrje të kamerave të sigurisë. Në kuadër të hetimit dyshohet se janë evidentuar edhe komunikime të drejtpërdrejta mes Hysenit dhe Agasit.

Sipas këtyre dyshimeve, Hyseni i ka dhënë Agasit informacione mbi lëvizjet dhe veprimet e strukturave policore, duke i vënë në dispozicion të dhëna që lidhen me infrastrukturën dhe aktivitetin e autoriteteve gjatë periudhës kur ai ishte në kërkim.

Prokuroria e Posaçme dyshon për dy vepra penale: nxjerrjen e sekretit hetimor dhe shtetëror për shkak të detyrës dhe përkrahjen e autorit të krimit.

Lala tha gjithashtu se hetuesit dyshojnë që ish-drejtuesja e SHISH-it i ka siguruar Agasit edhe informacione personale që lidhen me të, gjatë kohës që ai ishte në kërkim, si dhe të dhëna apo dokumente për persona të tjerë, të cilat dyshohet se i kishte siguruar për shkak të funksionit të saj.

Sipas gazetares, bazuar në materialet e administruara gjatë hetimit, Gjykata e Posaçme ka vlerësuar se në këtë fazë ekzistojnë prova të mjaftueshme për caktimin e masës së sigurisë. Megjithatë, bëhet fjalë për dyshime dhe akuza në kuadër të një hetimi, ndërsa përgjegjësia penale e Hysenit do të përcaktohet nga procesi gjyqësor.