Mazniku mbron reformën territoriale: Bashkitë e reja do të jenë më funksionale

Bashkëkryetari i Komisionit për Reformën Territoriale, Arbjan Mazniku u shpreh se, edhe pse disa bashki do të bashkohen, qytetarët nuk do të humbasin shërbimet. Si shembull ai përmendi Maliqin, i cili do të ruajë statusin e qytetit, do të ketë një nënkryetar të dedikuar dhe përfaqësim proporcional në Këshillin Bashkiak të Korçës.

Sipas tij, reforma është mbështetur në analiza të detajuara ekonomike, demografike dhe administrative. Ai tha se janë marrë në konsideratë niveli i borxheve të bashkive, funksionaliteti i tyre, zhvillimi ekonomik i territoreve, si edhe lëvizjet e popullsisë nga zonat rurale drejt atyre urbane.

Mazniku theksoi se aktualisht rreth 60% e popullsisë jeton në zonat urbane dhe 40% në zonat rurale, një realitet që, sipas tij, kërkon një organizim të ri territorial.

Lidhur me mungesën e dakordësisë me opozitën, Mazniku deklaroi se mazhoranca i ka dhënë të gjitha mundësitë për të arritur një konsensus, por sipas tij, opozita ka kërkuar rritjen e numrit të bashkive, një propozim që nuk u konsiderua i përshtatshëm.

Ai shtoi se drafti parashikon 46 bashki dhe 71 qytete, duke argumentuar se ky model krijon një ekuilibër më të mirë mes efikasitetit administrativ dhe përfaqësimit të qytetarëve.