Kryeministri i Kosovës, Albin Kurti tha se s’do të ndodheshim në këtë situatë nëse Serbia do të sanksionohej ndërkombëtarisht pas rrëmbimit të policëve vitin e kaluar dhe pastaj pas sulmit në Banjskë të Zveçanit ku u vra rreshteri Afrim Bunjaku. Ai u shpreh se arrestimet në masë që Serbia po bën nëpër kufij nuk do të ndodhnin nëse Serbia do të ishte sanksionuar.

“Po të kishte sanksione ndaj Beogradit atëherë kur u rrëmbyen tre policët tanë, më 14 qershor të vitit të kaluar në veri të Kosovës, ose kur u vra rreshteri Afrim Bunjaku nga një grup i paramilitarëve më 24 shtator të vitit të kaluar, ne nuk do të ndodheshim në këtë gjendje. Sot arrestimet në masë që po bën Serbia ndaj qytetarëve të vendit tonë, qofshin ata qytetarë të zakonshëm që e përdorin Serbinë si vend tranzit për t’u kthyer në Kosovë nga vendet e Bashkimit Europian apo për të shkuar atje, qofshin ata zyrtarë shtetërorë si puna e zëvendësdrejtorit të Policisë, nuk do tëndodhnin nëse Serbia të ndodhej nën sanksione”, tha kryeministri.

Kurti tha se mungesa e sanksioneve “e ka trimëruar Serbinë”, teksa uroi që kjo sjellje e Beogradit “të paraqesë një etapë të re”, në të cilën “do të kuptohet që Kosova është shtet demokratik” dhe se “Serbia është praktikisht shtet mafioz”.

Më tej, Kurti përmendi shkeljet që tha se Serbia i ka bërë marrëveshjes për rrugën drejt normalizimit të marrëdhënieve.

“Unë mbetem me shpresë që do të fillojmë një etapë të re, në të cilën do të kuptohet që kemi një shtet demokratik si Kosova dhe një shtet mafioz si Serbia, e cila e ka në krye një president që shfaqet herë si mafioz, herë si kryeprokuror, e herë si kryepolic” – potencoi kryeministri Albin Kurti.

Ministri i jashtëm serb Ivica Daçiç edhe një herë ka shprehur mllefin e tij për shkak të nismës për Rezolutën mbi gjenocidin e kryer nga serbët në Srebrenicë në Asamblenë e Përgjithshme të Kombeve të Bashkuara.

“Nuk ka gjenocid që nuk është kryer nga vendet që tani mbështesin Projekt-Rezolutën për gjenocidin në Srebrenicën në Asamblenë e Përgjithshme të Kombeve të Bashkuara, por forca mund të bëjë gjithçka” – ka thënë Daçiç, i cili pretendon se sipas konsultimeve jozyrtare në Nju Jork shihet se “nuk ka patur konsensus për këtë çështje”.

Ai u shpreh se “projekti zero” i rezolutës u prezantua nga Gjermania dhe Bosnja e Hercegovina, duke “pyetur” se nëse bëhet fjalë për një përfaqësues të Bosnje-Hercegovinës apo “vetëm për një ambasador të kombësisë boshnjake”. “Sikur të ishte një serb (i Bosnjës) në Nju Jork, nuk do të kishte asgjë nga kjo rezolu të. Sikur të ishte një serb në Strasburg, nuk do të kishte asgjë as nga votimi. Si mund të votojë Bosnja dhe Hercegovina për pranimin e Kosovës në KiE dhe të presë që ne të respektojnë integritetin dhe sovranitetin e saj territorial” – ka pyetur Daçiç.

Ai gjithashtu ka përsëritur se rezoluta është prezantuar, porse nuk është shprehur dëshira për të diskutuar, teksa “shumë vende kanë shprehur kundërshtime” për mënyrën e miratimit të tekstit të rezolutës.

“Kurrë nuk ka ndodhur të mos ketë konsensus për çështje të tilla. Mendoj se nuk vlen të diskutohet sepse bëhet fjalë për drejtësi selektive. Le të sjellim ndërmend gjenocidet e kryera nga Gjermania, Holanda dhe Turqia”- theksoi ministri serb.

Ai gjithashtu ka thënë se “është shumë interesant fakti se presidenti i Maqedonisë së Veriut, Stevo Pendarovski nuk ishte i informuar” se vendi i tij e kishte mbështetur rezolutën për Srebrenicën.

Drejtori i Institutit ESI, Gerald Knaus, ka thënë se veprimet e Serbisë për të eskaluar situatën po bëhen me qëllim që ta shtyjë votimin për aplikimin e Kosovës në Këshill të Europës në takimin e Komitetit të Ministrave.

“Ky përshkallëzim ka një qëllim të vetëm: Të nxitë Gjermaninë, Francën dhe Mbretërinë e Bashkuar që të shtyjnë votimin për anëtarësimin e Kosovës në Këshillin e Europës. Duke e bërë këtë, vuçiç largon vëmendjen nga mesazhi i fortë që erdhi nga 3/4 e anëtarëve të asamblese parlamentare të këshillit të europës se Kosova tani është gati t’i bashkohet këtij organi. A do të funksionojë përshkallëzimi? A do të shtyhet votimi? Nëse funksionon, rrezikon të jetë një verë shumë e dhunshme në vitin 2024 në Ballkan” – ka theksuar Kanus BE

Kujtojmë se dje dhe ambasadorët e SHBA-së dhe Gjermanisë sot kanë reaguar për veprimet e Serbisë kundër qytetarëve të Kosovës, duke kërkuar që të qetësojet situata.

Kryetari i Nismës Evropiane për Stabilitet, Gerald Knaus, ka thënë gjithashtu se qëllimi i Serbisë me sulmin terrorist në Banjskë të Zveçanit, ishte “që të ndryshonte kufijtë permes përdorimit të forcës”.

Në një intervistë për Zërin e Amerikës, ai u shpreh se qëllim tjetër i Beogradit ka qenë edhe “që të largojë Policinë e Kosovës nga Veriu”.

“Kjo gjë do ti mundësonte futjen e armëve, siç ka ndodhur me muaj të tërë, përmes rrugëve të kontrabandës, të cilat Policia e Kosovës ka tentuar t’i mbyllë” – tha Knaus duke theksuar: Me më shumë armë në Veri, kolapsin e institucioneve  dimrin e kaluar, me gënjeshtrat dhe urrejtjen nacionaliste që po ushqehen mediat e afërta me regjimin e Vuçiç, të gjitha përgatitjet po bëhen për një konfrontim të armatosur, të cilin Serbia shpreson dhe beson ta fitojë”  – I pyetur për përfshirjen e mundshme të Federatës Ruse në këtë sulm terrorist, ai theksoi se nuk është e nevojshme për një lidhje me Moskën për të shpjeguar atë që ndodhi.

Në zgjedhjet në Maqedoni të Veriut (si presidenciale, ashtu edhe parlamentare), kryeministri Albin Kurti, është duke bërë fushatë për ta rrëzuar Ali Ahmetin nga pushteti atje, mirëpo përkundër kësaj përpjekje të tij, zyrtarët e partisë që udhëheqë Ahmeti, Bashkimi Demokratik për Integrim, po lobojnë për Kosovën, madje po përballen me përfaqësues të Serbisë në momente delikate për të ardhmen e vendit, siç është anëtarësimi në organizata ndërkombëtare.

Në debatit që u zhvillua brenda Asamblesë Parlamentare të KiE-së, ku kundërshtimet e përfaqësuesve serbë ishin të ashpra, njëra nga ato që u përballë me ta dhe që ngriti fuqishëm zërin pro Kosovës, ishte pikërisht deputetja e BDI-së, Arta Bilalli.

Ajo përmendi mes të tjerash faktin se të gjitha vendet demokratike ftojnë Kosovën dhe Serbinë për dialog mes tyre, prandaj, në vlerësimin e saj, anëtarësimi i Kosovës në këtë organizatë do ta përforconte dhe do ta shtynte përpara këtë proces.

Ky nuk është rasti i vetëm kur përfaqësuesit e BDI-së dalin në mbështetje të parezervë për Kosovën. Këtë e kanë bërë edhe më herët – shumë herë madje. Edhe vetë Ahmeti, por edhe përfaqësuesit e tij në Qeverinë e Maqedonisë së Veriut.

Kurti, tanimë zyrtarisht është i përfshirë në zgjedhjet e Maqedonisë së Veriut, duke marrë pjesë në tubime që i organizon koalicioni i partive opozitare shqiptare “VLEN”, të cilin e përkrah dhe brenda listave të të cilëve ka futur kandidatë për deputetë nga radhët e Lëvizjes Vetëvendosje.

Duke mbështetur opozitën shqiptare, kryeministri Kurti është rreshtuar kundër partisë më të madhe shqiptare në Maqedoni të Veriut, Bashkimit Demokratik për Integrim, rrjedhimisht kryetarit të saj Ali Ahmeti.

Në një intervistë për Albanian Post,ky i fundit ka treguar rreziqet malinje që mund të vinë në të ardhmen nga përfshirja e Kurtit në procesin elektoral të Maqedonisë së Veriut.

Kjo ndërhyrje e Kurtit, sipas liderit të BDI-së i hap rrugë orekseve të vendeve tjera si Bullgaria dhe Serbia, të cilat mund të organizojnë partitë e tyre në Maqedoninë e Veriut.

Kosova ka kaluar edhe fazën e dytë në Asamblenë Parlamentare, për tu antarësuar në Këshillin e Europës, dhe prandaj ky fakt ka nervozuar Serbinë e cila assesi nuk po e pranon një gjë të tillë. Për këtë ajo nisi të ndërmarr edhe veprime të ashpra ndaj Kosovës duke ndaluar fillimisht mbi një mijë qytetarë të Kosovës në kufirin Serbi-Kroaci, teksa po të njejtin pasi u mbajtën më shumë se 18 orë të kufizuaf dhe pas reagimeve të shumta u lanë të lirë.

Juristi Muhamet Kelmendi, ka komentuar veprimet agresive të Serbisë ndaj Kosovës, duke thënë se Beogradi zyrtar ka vënë në lëvizje veprime të rrezikshme dhe po kërcënon me aksione ushtarake.

“Nga dështimi i shtetit serb për të ndaluar Kosovën nga anëtarësimi në Asamblenë e Këshillit të Evropës, si dhe kërkesa në OKB për gjenocid në Srebrenicë, Beogradi ka vënë në lëvizje veprime të rrezikshme dhe po kërcënon me aksione ushtarake. Ka ditë që ushtria serbe me mjete të blinduara është 200 deri në 300 metra afer kufirit te Kosovës dhe me mijëra ushtarë me mjete të blinduara janë vendosur në Luginën e Preshevës” – ka treguar Kelmendi.

Juristi tha se Serbia po përgatitet për aksione terroriste në Kosovë, duke thënë se veprimet do të jenë të ashpëra dhe të shumëfishta, me sulme kundër objekteve, policisë dhe FSK-së. Aktet e fundit po tregojnë se Serbia po përgatitet për të vepruar kundër Kosovës. Së këndejmi pritet nga shteti serb që të veprojë me aksione të ashpra terroriste. Aksionet do të bëhen nga grupe të ndryshme në veri të Kosovës, në katër komunat, si dhe në pjesët e tjera të Republikës. Priten sulme në Prishtinë, në Shtërpcë, në Mitrovicë, në Gjilan, në Graçanicë e në vende tjera. Veprimet do të jenë të ashpëra dhe të shumëfishta, me sulme kundër policisë dhe FSK-së”, deklaroi juristi i njohur.

Ai për të gjitha këto tha se nga Kosova kërkohet të jetë e përgatitur me dhjetëra mijëra ushtarë dhe me mijëra forca speciale policore. Mirë që është edhe NATO në Kosovë. Kjo është garanci e madhe e paqes.

Por, shumë shpejtë mund të ndryshohet gjendja, atëherë kur NATO nuk e garanton më rendin dhe sigurinë, paqen në Kosovë. Këtu hyne FSK dhe Policia në veprim. Me këto dy mekanizma të përgatitur dhe të armatosur mund të sigurohet dhe të mbrohet vendi. Republika kërkohet të mendojë për çdo opsion. Koha nuk pret”- ka potencuar Kelmendi.