Ronaldo nuk ka ndërmend të tërhiqet: Kam dy objektiva, 1000 golat dhe…

Cristiano Ronaldo vijon të jetë një nga figurat kryesore të kombëtares së Portugalisë, pavarësisht pikëpyetjeve për të ardhmen e tij. Në prag të sfidës ndaj Uellsit, kapiteni portugez foli për objektivat e tij, marrëdhënien me trajnerin e ri Jorge Jesus dhe mundësinë që ky të jetë sezoni i fundit i karrierës së tij.

Ronaldo, i cili ka punuar me Jorge Jesus edhe te Al Nassr, ku fituan kampionatin saudit sezonin e kaluar, e cilësoi ardhjen e trajnerit në stolin e Portugalisë si një zgjedhje të përshtatshme. Sipas tij, përvoja e disa lojtarëve me Jesus mund ta bëjë më të lehtë përshtatjen me mënyrën e tij të punës.

Në konferencën për shtyp, Ronaldo bëri të qartë se ka ende objektiva të mëdha. Ai synon të arrijë 1000 gola në karrierë dhe të fitojë sërish Ligën e Kombeve me Portugalinë.

Sulmuesi theksoi gjithashtu se kritikat për vazhdimin e tij me kombëtaren nuk e kanë ndryshuar vendimin për të qenë pjesë e skuadrës. Ai tha se gjatë këtij viti ka ndjerë mbështetje të madhe nga tifozët, ndërsa u shpreh se disa media vazhdojnë të jenë kritike ndaj tij.

Megjithatë, Ronaldo pranoi se fundi i karrierës po afrohet. Sipas tij, është e mundur që ky të jetë viti i fundit si futbollist profesionist, por vendimin për tërheqjen do ta bëjë publik në momentin që do ta konsiderojë të përshtatshëm.

Në këtë fazë të karrierës, portugezi tha se menaxhimi i ngarkesës fizike është i rëndësishëm dhe se nuk pret të luajë çdo ndeshje nga minuta e parë deri në fund. Ai megjithatë garantoi se do të jetë në dispozicion të Jorge Jesus, pavarësisht rolit që trajneri do t’i japë.

Ronaldo theksoi se arsyeja për të cilën vazhdon të grumbullohet me Portugalinë nuk është vetëm emri apo CV-ja e tij, por kontributi që jep aktualisht në klub.

Sfida ndaj Uellsit ka një simbolikë të veçantë për të, pasi do të luhet në stadiumin “Alvalade”, aty ku nisi rrugëtimin e tij në futbollin profesionist. Ronaldo e cilësoi rikthimin në këtë stadium si një moment të veçantë pas shumë vitesh në nivelet më të larta të futbollit.

Në të njëjtën kohë, gara për 1000 golat mbetet një tjetër objektiv i madh. Ronaldo tha se e mendon këtë shifër, por nuk e konsideron një obsesion. Ai pranoi se pas Kupës së Botës kishte menduar edhe për tërheqjen nga futbolli, por pas bisedave me drejtuesit e Portugalisë vendosi të vazhdojë.