✦
Thinking ...
Connect with us

Kronike

“U jap rrogë Ministrit, antidrogës dhe gjykatësve”/ Mesazhet e organizatës kriminale Çopja-Çela

Detaje të reja nga dosja hetimore e organizatës kriminale Çopja-Çela zbulojnë përmasat e dyshuara të trafikut ndërkombëtar të kokainës, lidhjet e grupit në Amerikën Latine dhe shumat e mëdha të parave që dyshohet se janë gjeneruar nga aktiviteti kriminal. SPAK e ka dërguar çështjen për gjykim në Gjykatën e Posaçme, ndërsa komunikimet e zbërthyera në aplikacionin Sky ECC përbëjnë një nga burimet kryesore të provave të përmendura në dosje.

Në qendër të disa prej komunikimeve është Ervis Çela nga Peqini, i cili dyshohet se gjatë qëndrimit në Paraguai kishte krijuar lidhje me zyrtarë të lartë të këtij shteti. Në bisedat e publikuara nga Euronews Albania, ai pretendon se paguante rregullisht drejtues të policisë, përfaqësues të antidrogës dhe gjyqtarë, për të siguruar mbrojtje dhe për të lehtësuar aktivitetin e trafikut të drogës.

Në një komunikim me Francin, Çela shprehet se kishte krijuar një rrjet mbështetjeje në institucionet vendase, duke pretenduar se u paguante rroga mujore drejtuesve të policisë dhe zyrtarëve të tjerë. Këto deklarata paraqiten si pretendime të tij në komunikimet e zbardhura dhe jo si fakte të provuara më vete.

Nga letërporositë e autoriteteve paraguajane, sipas dosjes, rezulton se Çela dyshohet se ka përdorur në zonën e Aguilar një identitet të rremë, atë të Joze Medardo Rodriguez Aguilar, me kombësi ekuadoriane. Hetimet evidentojnë gjithashtu bashkëpunimin e tij të dyshuar me shtetasin brazilian Clayton Santos Lima për sigurimin dhe trafikimin e sasive të mëdha të kokainës drejt Europës.

Në Paraguai kanë udhëtuar edhe Ardian Çela, vëllai i Ervis Çelës, si dhe Fadil Balla, i njohur me emrin Julian dhe nofkën “Shijaksi”. Ky i fundit është gjithashtu pronar i resortit “Ajman”, të sekuestruar nga SPAK, dhe rezulton në kërkim ndërkombëtar si person i dyshuar për përfshirje në organizatë.

Një nga elementet më të rëndësishme të dosjes lidhet me qarkullimin financiar të grupit. Sipas SPAK, vetëm gjatë periudhës 9 nëntor deri më 7 dhjetor 2020, nga komunikimet mes Renato Musakut dhe Petrit Lakatos rezulton se janë gjeneruar dhe grumbulluar 151 milionë e 380 mijë euro. Në të njëjtat biseda përmendet pritshmëria për mbledhjen e 40 milionë eurove të tjera.

Ndërkohë, për periudhën nga nëntori 2019 deri në mars 2021, hetuesit kanë evidentuar se organizata e dyshuar ka qarkulluar të paktën 520 milionë euro, të cilat dyshohet se burojnë nga trafiku i kokainës.

Përmasat e aktivitetit dalin edhe në një tjetër bisedë mes Franc Çopjas dhe bashkëpunëtorëve të tij. Në komunikim, ai pretendon se organizata kishte arritur të trafikonte 12 tonë kokainë drejt Europës, duke e cilësuar këtë si një nga operacionet më të mëdha të realizuara. Në të njëjtën bisedë përmend edhe një rekord të mëparshëm prej 8.7 tonësh, si dhe një sasi tjetër prej 3 tonësh që, sipas tij, nuk ishte përfshirë në operacion.

Sipas dosjes, kokaina transportohej e fshehur në ngarkesa me kuti boje. Anëtarët e dyshuar të organizatës merreshin më pas me nxjerrjen e pakove nga paletat, për të mundësuar shpërndarjen e drogës.

Komunikimet e zbardhura hedhin dritë edhe mbi dyshimet për trafik armësh. Sipas hetimeve, Ervis Çela i ofronte Franc Çopjas pistoleta dhe armë të gjata, që dyshohet se siguroheshin në Paraguai. Në biseda përmenden armë të prodhuara në fabrikë dhe të pajisura me silenciator.

Hetimet e SPAK kanë çuar në dërgimin për gjykim të personave të dyshuar si pjesë e këtij rrjeti, ndërsa të dhënat e dosjes paraqesin një aktivitet që shtrihej nga Amerika Latine në Europë, me dyshime për trafik droge, armësh, korrupsion zyrtarësh dhe qarkullim të qindra milionë eurove.

Advertisement