VIRUSI I NILIT PERËNDIMOR/ Konfirmohet rasti i dytë në Shqipëri, sërish në Korçë

Një tjetër rast i virusit të Nilit Perëndimor është konfirmuar në Shqipëri, duke e çuar në dy numrin e personave të prekur gjatë vitit 2026. Edhe rasti i dytë është regjistruar në qarkun e Korçës, ku u evidentua edhe infektimi i parë i këtij viti.

Rasti i parë u konfirmua në muajin gusht dhe bëhej fjalë për një 72-vjeçar nga Korça. Pas shfaqjes së problemeve shëndetësore, ai iu drejtua Spitalit Rajonal të Korçës, ku analizat laboratorike konfirmuan infektimin me virusin e Nilit Perëndimor.

Pas evidentimit të rastit të parë, Instituti i Shëndetit Publik ndërmori hetim epidemiologjik dhe entomologjik në qarkun e Korçës. Specialistët zhvilluan kontrolle në terren për të verifikuar praninë e mushkonjave që mund të transmetojnë virusin, ndërsa u morën edhe mostra për analiza nga banorë të zonës.

Virusi i Nilit Perëndimor transmetohet kryesisht përmes pickimit të mushkonjave të infektuara. Në shumicën e rasteve, infeksioni mund të kalojë pa shenja të dukshme, ndërsa personat që shfaqin simptoma mund të kenë temperaturë, dhimbje koke, lodhje, dhimbje muskujsh, të përziera dhe të vjella.

Në raste të rralla, infeksioni mund të prekë sistemin nervor dhe të shkaktojë forma më të rënda të sëmundjes. Konfirmimi i rastit të dytë në të njëjtin qark e rikthen në vëmendje nevojën për monitorimin epidemiologjik dhe kontrollin e mushkonjave që mund të shërbejnë si bartëse të virusit.