Sali Berisha ka komentuar miratimin nga ana e Asamblesë së OKB-së të Rezolutës që e vendos 11 Korrikun Ditën Ndërkombëtare të Reflektimit dhe Përkujtimit të Gjenocidit të vitit 1995 në Srebrenicë.

Gjatë fjalës së tij në tubimin e përditshëm qytetar, Berisha shprehet se Edi Rama dhe deputetët e tij kundërshtuan rezolutën e denoncimit serb në Srebrenicë në parlamentin shqiptar.

Berisha shprehet se sot nën diktatin ndërkombëtar Rama u detyrua të votojë ndryshe, por në parlament votoi kundër dënimit të gjenocidit serb në Srebrenicë, sepse urdhri ishte i prerë nga padroni i tij, Vuçiç.

Pjesë nga fjala e Berishës:

“Të dashur qëndrestare dhe qëndrestarë, misionarë të vërtetë të dinjitetit, të lirisë, ju përshëndes përzemërsisht për qëndresën tuaj. Përshëndes nga zemra oratorët e kësaj platforme të fjalës së lirë, për të vërteta që u përcjellin shqiptarëve. Të dashur miq, sot për popujt e Ballkanit por dhe mbarë njerëzimin, është një ditë e shënuar.

OKB vendosi të shpallë 11 korrikun ditën e kujtimit të genocidit serb në Srebrenicë. Me këtë akt, bota e qytetëruar nderon, kujton viktimat e pafajshme të barbarisë serbe në Bosnje. Me këtë akt, shteti genocidal që ka kryer në trevat e Ballkanit genocidet ciklike, veçanërisht mbi shqiptarët, merr damkën për barbarinë e saj.

Miqtë e mi, jeni dëshmitarë se si Edi Rama dhe deputetët e tij kundërshtuan rezolutën e denoncimit serb në Srebrenicë në parlamentin shqiptar. Mos harroni kurrë kartonat e tyre të kuq. Ato kartona të kuq janë dhe do mbeten përjetë të stamposur në muret e parlamentit si dëshmia e amoralitetit dhe shpirtit të zi të tyre. Mos harroni kurrë atë ditë!

Se sot nën diktatin ndërkombëtar u detyrua të votojë ndryshe, por në parlament votoi kundër dënimit të gjenocidit serb në Srebrenicë, sepse urdhri ishte i prerë nga padroni i tij, Vuçiç. Po kështu, dy vite me radhë, tradhtari, Pashiqi i shqiptarëve bllokoi rezolutën për denoncimin e genocidit serb në Kosovë. Dhe pastaj me pafytyrësi, vetëm 5 ditë më parë u thoshte shqiptarëve në Kosovë se edhe më quani tradhtar. Po jo tradhtar, po historia nuk ka njohur kurrë tradhtar si ti.”, tha Berisha.

Sali Berisha ka shpërthyer ndaj kreut të SPAK Altin Dumani.

Gjatë fjalës në tubimit mbrëmjen e sotme, Berisha ka akuzuar Altin Dumanin se po amniston krimin elektoral, me kërkesën që të ndryshohet kushtetuta dhe ti zgjatet mandati i tij në SPAK.

“Po rri aty mor horr se do japësh llogari për të gjitha këto që bën dhe nuk ka gjë në botë që të shpëton ty”, shtoi më tej kryedemokrati.

Fjalimi i plotë:

Miqtë e mi, beteja jonë është më e rëndësishmja në tërë historinë e këtij vendi pas pavarësisë së Shqipërisë.

Diktatura komuniste u rrëzua, por ajo në këmbë nuk mund të qëndronte.

Diktatura e drogës, e krimit, e vjedhjeve, e korrupsionit të tmerrshëm është diktatura më e egër, më shkatërrimtare për kombin dhe qenien e tij.

Miqtë e mi, koha po vjen me moton: ja të vdesim, ja të rrojmë për liri.

Ja të vdesim ja të rrojmë për votën e lirë.

Ky duhet të jetë dhe do të jetë lajtmotivi i luftëtarëve të lirisë, lajtmotivi i atyre që do të shembin diktaturën.

Të dashur miq, me aktin makabër të kryehorrit të historisë së akuzës shqiptare, Altin Dumani, u godit përfundimisht çdo shpresë, çdo mundësi për të vendosur para ligjit kriminelët elektoralë.

Miq, njoftimi që ai u bëri familjeve mafioze armike për jetë dhe vdekje të votës së lirë të shqiptarëve, ky kriminel, ky mercenar u tha shqiptarëve se ju kot votoni.

Sepse hanxharët e krimit prapë do ju numërojnë ju votat.

Pushteti i krimit sërish do sundojë mbi ju.

Ju e patë vetë mercenarin që shëtit nga një zyrë në tjetër me kërkesën e vetme të ndryshojmë Kushtetutën për prapanicën e tij.

Po rri aty mor horr se do japësh llogari për të gjitha këto që bën dhe nuk ka gjë në botë që të shpëton ty.

Dashke të ndryshojmë Kushtetutën për ty!

A e dëgjonit miq, a e shihnit dje ekipin e kriminelëve, të hajdutëve se si ulnin kokën dhe betoheshin të ndryshonin Kushtetutën për menderen e mercenarit Altin Zamani.

Lajmërimi i bosëve më kryesorë që shkelmuan dhe dhunuan votën e shqiptarëve në tërë Shqipërinë e mesme, përbën amnistinë më kriminale të Edi Ramës dhe Altin Dumanit.

Pas Gjykata e Lartë vendosi gjatë ditës së enjte, që Sali Berisha të mos marrë pjesë në seancat parlamentare të Kuvendit të Shqipërisë, deputeti i PD, Edi Paloka, ka deklaruar se nuk është habitur aspak nga ky vendim.

Paloka tha se drejtësia e re është në duart e Ramës dhe se GJ shkeli ligjin.

“Për fat të keq nuk ka asgjë të re edhe në vendimin e sotëm të Gjykatës së Lartë. Është pjesë e një sistemi tashmë të kapur e të korruptuar të drejtësisë, të ashtuquajtur “drejtësisë së re”, e cila, të paktën siç e kemi denoncuar që në fillim, po vërtetohet çdo ditë e më shumë se nuk është gjë tjetër përveçse një mjet në duart e Ramës për të bërë presion, për të dënuar opozitën dhe për të mbajtur jashtë telasheve, jashtë problemeve, gjithë hajdutët dhe gjithë të korruptuarit e qeverisë. Kjo është e thënë trashë. Pra, unë kam kohë që nuk pres gjë, të jem i sinqertë, nga asnjë prej gjykatave.

Shihni vetëm një detaj, që është skandaloz. Nuk po i hyj gjithë historisë, sepse gjithë historia e dënimit të z. Berisha, “dënimit” – mbajtjes nën arrest të z. Berisha dhe të z. Malltezi – është një skandal. Por shihni vetëm detajin që është publik tashmë dhe një fakt i njohur botërisht me këtë gjyqtaren, Irena Gjokën, se Irena ka tre emra.

Domethënë kanë dalë të gjitha faktet që vërtetojnë se kjo zonja ka shkelur ligjin e duhet të ishte kjo sot përpara drejtësisë sepse ka shkelur ligjin duke deklaruar ose duke mos deklaruar – kjo është e njëjtë me një deklarim të rremë në deklaratën e saj – dhe nëse këto fakte janë publike, jo vetëm që ajo zonjë nuk hiqet, sepse dorëheqje nuk e lënë të japë, por “nuk e lejojnë” të japë dorëheqje.

Ajo është zgjedhur e tillë dhe jo vetëm ajo: të gjithë këta që janë zgjedhur për këtë të ashtuquajtur “drejtësi të re” janë zgjedhur qëllimisht me cene, janë zgjedhur qëllimisht me probleme, që të kenë se ku t’i kapin, ku t’i bëjnë presion dhe se si t’i detyrojnë që të bëjnë atë që kërkon Rama dhe ata që janë rrotull Ramës”, tha Paloka.

Avokati, Genc Gjokutaj ka komentuar vendimin e Gjykatës së Lartë e cila rrëzoi këtë të enjte kërkesën e kreut të PD-së, Sali Berisha për të shkuar në Kuvend.

Gjokutaj e quajti vendimin të pabazë, pasi sipas tij nuk ka asnjë vendim gjyqësor që ta ndalojë apo ta abrogojë mandatin e deputetit. Gjokutaj më tej akuzoi për këtë vendim kreun e qeverisë Edi Rama. Sipas avokatit, Rama po asfikson shtetin e së drejtës.

Gjokutaj:  “Gjykata e Lartë sot, me një paturpësi juridike, sepse është gjykata supreme, e cila nuk mund të mendohet që të bëjë “lajthitje” të tilla – po e them për delikatesë, sepse këto s’janë lajthitje, këto janë misione, detyra të marra përsipër nga kjo gjykatë –  në funksion të këtij pushteti, që siç e kemi thënë nuk ka lënë gjë pa kapur përveç zogjve që janë nëpër pemë (dhe ata nuk i janë dashur, sepse po të kish bërë ndonjë projekt do t’i kishin mbërritur) pra, Gjykata e artë pengon të vejë në Kuvend, zotin Berisha, liderin e opozitës, deputet të Kuvendit dhe nuk ka një vendim gjyqësor që ta ndalojë apo t’ia abrogojë mandatin e deputetit.

Në linjë me këtë, nëse e dëgjuat zotin Elmar Brok, ai filloi dhe mbaroi, bazuar në të drejtën evropiane – një parlamentar ekselent me vite të tëra dhe me profesion jurist, ai citoi dhe e përmendi herë pas here “të drejtën evropiane”, të drejtat që gëzon zoti Berisha në bazë të të së drejtës evropiane dhe mënyrën se si është vepruar në Shqipëri. Bile z. Elmar Brok kishte mësuar edhe shprehjen “afërmendsh”që gjykata vendosi ashtu siç thotë prokurori.  

Edhe unë prandaj e kam shkruar atë, sepse po kristalizohen dy shtete: shteti mafioz me në krye Edi Ramën dhe Erion Velinë dhe shteti i së drejtës, i cili është i asfiksuar dhe nën thundrën e këtij të parit dhe sa të jetë ky raport dhe kjo mazhorancë, këto vendime do të vijojnë dhe do të agravojnë akoma më shumë duke e larguar Shqipërinë nga e drejta evropiane, duke e larguar Shqipërinë nga standardet e një shteti ligjor, duke e larguar procesin larg të qenit i rregullt, me pasojë të drejtat themelore të individit në përgjithësi por edhe të të zgjedhurve, siç është zoti Berisha me votë nga populli, ku gjykatësit tanë nuk arrijnë të ndajnë subjektin e çështjes nga subjekti politik dhe subjekti i zgjedhur me votat e popullit dhe një person i zgjedhur nuk mund të trajtohet me këto instrumente që i trajtojnë gjykatat tona, ku një deputet trajtohet si një i paraburgosur i zakonshëm.”

Ministri i Jashtëm Igli Hasani ka reaguar pasi Asambleja e Përgjithshme e OKB-së miratoi sot rezolutën për përkujtimin e gjenocidit, të vitit 1995 në Srebrenicë.

Hasani u shpreh se 11 korriku do të jetë dita për të nderuar viktimat dhe për të mbështetur të mbijetuarit e gjenocidit në Bosnjë – Hercegovinë dhe kudo, dhe një kujtim i ashpër i tmerreve të së kaluarës.

Ai theksoi se Shqipëria bashkë-sponsorizoi dhe mbështeti këtë rezolutë, për një nga faqet më të errëta në historinë e Ballkanit, Evropës dhe botës.

Reagimi i plotë;

Asambleja e Përgjithshme e OKB-së miratoi sot një rezolutë për përkujtimin e genocidit, të vitit 1995 në Srebrenicë.

Çdo vit, 11 korriku do të jetë dita për të nderuar viktimat dhe për të mbështetur të mbijetuarit e gjenocidit në Bosnjë – Hercegovinë dhe kudo, dhe një kujtim i ashpër i tmerreve të së kaluarës, në mënyrë që ato të mos përsëriten në të ardhmen.

Shqipëria bashkë-sponsorizoi dhe mbështeti këtë rezolutë, për një nga faqet më të errëta në historinë e Ballkanit, Evropës dhe botës.