Hezbollahu i gatshëm për armëpushim të plotë dhe të menjëhershëm me Izraelin

Hezbollahu është i gatshëm të pranojë një armëpushim të plotë dhe të menjëhershëm me Izraelin, sipas një mesazhi që kryetari i Parlamentit të Libanit, Nabih Berri, i ka përcjellë administratës së presidentit amerikan Donald Trump.

Lajmi u bë i ditur nga Ali Hamdan, këshilltari kryesor i Berrit, i cili deklaroi për Axios se Libani është i gatshëm të garantojë zbatimin e një marrëveshjeje gjithëpërfshirëse armëpushimi.

Sipas Hamdan, të dielën ai kontaktoi ambasadorin amerikan në Bejrut, Michel Issa, duke i komunikuar se Hezbollahu është i gatshëm të angazhohet plotësisht në një armëpushim të përgjithshëm.

“Pse një armëpushim i pjesshëm? Le të kemi një armëpushim të plotë”, mësohet të ketë qenë përgjigjja e Berrit ndaj propozimit amerikan.

Administrata Trump kishte propozuar një marrëveshje të kufizuar, sipas së cilës Hezbollahu do të ndalonte sulmet ndaj veriut të Izraelit, ndërsa Izraeli do të angazhohej të mos godiste Bejrutin. Megjithatë, pala libaneze ka kërkuar një marrëveshje më të gjerë që të përfshijë ndalimin e luftimeve në tokë, ajër dhe det, si dhe ndërprerjen e shkatërrimit të banesave në jug të Libanit.

Burime të cituara nga Axios thonë se zyrtarët amerikanë dyshojnë se kryeministri izraelit Benjamin Netanyahu do të pranonte një armëpushim të tillë në kushtet aktuale.

Zhvillimi vjen në një moment kur tensionet në Liban po rriten dhe rrezikojnë të minojnë përpjekjet diplomatike për një marrëveshje më të gjerë mes Shteteve të Bashkuara dhe Iranit.

Të hënën, Netanyahu dhe ministri i Mbrojtjes Israel Katz paralajmëruan se Izraeli mund të godasë objektiva të Hezbollahut në zonën Dahieh të Bejrutit, duke argumentuar se grupi shiit ka shkelur vazhdimisht armëpushimin ekzistues.

Nga ana tjetër, ministri i Jashtëm iranian Abbas Araghchi deklaroi se veprimet izraelite në Liban përbëjnë shkelje të armëpushimit mes SHBA-ve dhe Iranit, duke paralajmëruar se Washingtoni dhe Tel Avivi do të mbajnë përgjegjësi për pasojat e çdo përshkallëzimi të mëtejshëm.

Sipas mediave iraniane, Teherani ka pezulluar përkohësisht komunikimet me ndërmjetësit amerikanë derisa të ndalen sulmet izraelite në Liban.