Trump hap thesin, premton 5 mijë dollarë për çdo amerikan nëse fiton zgjedhjet

Presidenti amerikan Donald Trump ka bërë një premtim të bujshëm gjatë konventës së republikanëve në Dallas, në kuadër të përgatitjeve për zgjedhjet e mesmandatit në Shtetet e Bashkuara.

Trump deklaroi se, nëse republikanët arrijnë të fitojnë kontrollin e Dhomës së Përfaqësuesve dhe Senatit, çdo i rritur amerikan mund të përfitojë një “dividend” prej 5 mijë dollarësh. Sipas presidentit amerikan, këto para duhet të shpenzohen brenda Shteteve të Bashkuara, duke synuar nxitjen e ekonomisë vendase.

Gjatë fjalimit, Trump u bëri thirrje qytetarëve amerikanë të votojnë për kandidatët republikanë, duke e cilësuar garën e ardhshme si vendimtare për të ardhmen e vendit.

Ai paralajmëroi se një fitore e demokratëve do të vinte në rrezik politikat e administratës së tij për kontrollin e kufijve, taksat, sigurinë kombëtare dhe ekonominë.

Një pjesë e rëndësishme e fjalimit iu kushtua edhe konfliktit me Iranin. Trump mbrojti sulmet amerikane ndaj objektivave iraniane, duke argumentuar se ndërhyrja e SHBA-së ishte e nevojshme për të parandaluar Teheranin të siguronte armë bërthamore.

Presidenti amerikan la gjithashtu të hapur mundësinë për ndërmarrjen e goditjeve të tjera, nëse rrethanat do ta kërkonin.

Trump iu rikthye edhe stilit të tij karakteristik me deklarata të pazakonta rreth emërtimeve gjeografike.

Me humor, ai tha se Ngushtica e Hormuzit mund të quhej “Ngushtica e Trumpit”, ndërsa hodhi edhe idenë që shteti i New Mexico të riemërtohej “New America”.

Një tjetër temë e rëndësishme e fjalimit ishin tarifat doganore, të cilat Trump i cilësoi si një prej instrumenteve kryesore për forcimin ekonomik të Shteteve të Bashkuara.

Ai deklaroi se SHBA-ja po arkëton miliarda dollarë falë tarifave, duke i paraqitur ato si një burim të rëndësishëm të ardhurash për vendin.

Trump foli edhe me humor për mënyrën se si mediat kanë reaguar ndaj politikës së tij tarifore. Ai tha se kishte vendosur ta zbriste fjalën “tarifa” nga vendi i parë në vendin e pestë në listën e fjalëve të tij të preferuara.

Fjalimi i presidentit amerikan zgjati rreth dy orë dhe u mbyll në një atmosferë festive, me këngën “Y.M.C.A.”, ndërsa delegatët republikanë e shoqëruan me duartrokitje.