“Paralizohet” transporti dhe ekonomia në Spanjë, revoltë kundër çmimit të lartë të banesave

Spanja është përfshirë nga një grevë e përgjithshme 24-orëshe, e para e këtij lloji në 14 vitet e fundit. Mobilizimi është organizuar nga sindikatat kryesore në shenjë proteste kundër rritjes së çmimeve të banesave, qirave dhe kostos së jetesës.

Greva ka shkaktuar ndërprerje në transportin publik dhe shërbime të tjera, si dhe bllokime në disa akse kryesore rrugore në Madrid dhe Katalonjë. Sipas Ministrisë së Brendshme, mbi 40 persona janë arrestuar dhe janë regjistruar qindra incidente në të gjithë vendin. Gjatë protestave janë raportuar edhe përplasje mes demonstruesve dhe policisë, si dhe sulme ndaj zyrave të agjencive imobiliare.

Sindikatat e kanë cilësuar mobilizimin të suksesshëm, duke pretenduar pjesëmarrje të lartë. Nga ana tjetër, organizatat e biznesit raportojnë pjesëmarrje të ulët dhe të pabarabartë në sektorë të ndryshëm.

Në qendër të pakënaqësisë janë vështirësitë për të përballuar kostot e banimit. Në Madrid, qiraja mujore për një apartament me sipërfaqe 50 metra katrorë arrin mesatarisht në 1,170 euro, shumë që përbën pothuajse gjysmën e pagës mesatare mujore bruto.

Protestat zhvillohen në një klimë të tensionuar politike, më pak se tri javë para zgjedhjeve parlamentare të 29 nëntorit. Kryeministri Pedro Sánchez ka mbështetur të drejtën e punëtorëve për të protestuar, ndërsa opozita e ka cilësuar grevën si një mobilizim me motive elektorale.

Ndërkohë, sipas operatorit energjetik Red Eléctrica, konsumi i energjisë elektrike gjatë orëve të para të grevës ka rënë me 7.5 për qind, një tregues i ndikimit të mobilizimit në aktivitetin ekonomik të vendit.