Zjarri në pallatin në Lezhë/ Administratori: Po zbrisja shkallët kur pashë flakët…

Administratori i pallatit ku shpërtheu zjarri në lagjen “Skënderbeg” në Lezhë, Man Sinani, tregon momentet e para të ngjarjes dhe ndërhyrjen për evakuimin e banorëve.

Sinani thotë se ishte rreth orës 16:00, kur po zbriste shkallët e pallatit, që vuri re flakët në katin e parë. Ai njoftoi menjëherë policinë dhe zjarrfikësen, ndërsa së bashku me të tjerë ndihmoi në nxjerrjen e banorëve nga godina.

“Ishte ora 16:00, isha duke zbritur shkallët kur shoh flakë te kati i parë këtu se jam edhe administratori i pallatit, thashë çka ndodhur. Shkoj gjej një person aty, i shkreti, lajmëruam policinë dhe erdhëm. Nxorrëm edhe njerëzit, falënderoj zjarrfikësen që i nxori të gjithë nga kati i parë në të fundit. U bë mjegull e tym”, tregon administratori.

Administratori rrëfen se situata u bë edhe më shqetësuese për shkak të tymit të dendur dhe frikës se në banesë mund të kishte bombola gazi.

Nga zjarri, disa banorë kanë pësuar lëndime të lehta dhe shenja asfiksie, por sipas informacioneve paraprake, ndodhen jashtë rrezikut për jetën.