I zhdukur prej dy ditësh/ Nëna ngre alarmin, thirrje për ndihmë për gjetjen e djalit të saj 24 vjeçar (EMRI)

Një familje në Vlorë po kërkon ndihmën e qytetarëve për gjetjen e 24-vjeçarit Xhuliano Aliu, i cili është larguar nga banesa mbrëmjen e së mërkurës dhe prej dy ditësh nuk ka dhënë asnjë informacion për vendndodhjen e tij.

Ka qenë nëna e të riut ajo që i është drejtuar redaksisë sonë për të bërë publik rastin, me shpresën se apelimi do të ndihmojë në gjetjen e djalit të saj. Sipas familjarëve, kontakti i fundit me Xhulianon ka qenë rreth orës 22:00, ndërsa telefoni i tij rezulton i fikur.

24-vjeçari është parë për herë të fundit në rrugën e Çipajve, në Vlorë. Në momentin e largimit, ai kishte veshur xhinse bojëqielli, bluzë të zezë dhe mbante një kapele ngjyrë bezhë.

Familja ka bërë kallëzim në polici dhe, sipas nënës, është informuar se kërkimet për gjetjen e të riut vijojnë.

Nëna e Xhulianos u bën thirrje qytetarëve që, nëse e kanë parë ose disponojnë çfarëdo informacioni për vendndodhjen e tij, të ndihmojnë në gjetjen e djalit.

Çdo person që ka informacion mund të kontaktojë në numrin +355 69 456 5423 ose të njoftojë menjëherë Policinë. Edhe një detaj i vogël mund të jetë i rëndësishëm për familjen.